2013科技預言書
無驚無險度過12月21日「世界末日」，大家都應該收拾心情迎接2013年了。新一年科技Trend點走？其實從2012年第四季已見端倪。電視方面非常明顯地朝OLED以及4K（Ultra High Definition）方向發展；手機應該會愈玩愈大，6吋畫面手機將會湧現市場；隨住Wii U在今年年底面世，另外兩個家用主機平台在2013年都應該會有回應；Windows 8推動Ultrabook及Notebook篤芒化，也會成為主流，機身玩Design的同時，售價應有下調空間。只要一日未「末日」，科技潮流一樣會向前捲，不過照計2013年未必會好大浪就真！
電視：OLED及UHDTV：大尺寸OLED電視4月面世
2013年電視市場有兩大方向：OLED同4K。OLED其實唔算好新嘅技術，OLED亦即Organic Light Emitting Display，原理係以電場驅動下，將有機半導體和發光材料製成的屏幕自行發光，光度比LCD更平均外，亦毋須像LCD電視般要加上背燈，因而機身更薄。OLED技術成本貴，以往都係造啲十幾廿吋的小型顯示屏，到2012年年初CES先至有大型OLED TV展示，不過LG就搶先於上個星期在香港展出首部55吋OLED TV，採用幼邊框，機身厚度僅4mm，仲可以睇埋3D。現貨要到2013年4月先至開賣，售價方面就未定實，照計既然係大量生產，價錢方面應該都入到屋，看來即將舉行的CES 2013將會有更多嘢睇！
4K電視有望普及
隨住OLED技術正式進駐家用電視市場，有報道指Panasonic將會於2013年停止開發顏色靚但頗耗電嘅Plasma Panel，雖然廠方未正式發表有關消息，但似乎只係時間問題。另一個電視界熱門話題係4K顯示，即依家定名做Ultra HD TV嘅超高清顯示，顯示解像度等同全高清電視的4倍。Sony跟LG都相繼在2012年年底出招，推出84吋大型Ultra HD TV，索價18萬至21萬餘元。當然Ultra HD TV解像度超高，要配合大尺寸畫面先顯示到佢嘅威力，惟目前真正4K內容少之又少，要在2013年推得起都唔容易。
值得一提係，坊間亦開始有平價細尺寸4K電視機，雖然觀感真係差好遠，但勝在「平民化」後有望推動4K普及，對用家嚟講都係一件好事！另外，傳聞中嘅Apple iTV有可能會成事，Tim Cook喺本月訪問時話佢哋對電視市場有好大興趣咁話喎。
遊戲機：Xbox 720 vs PS4？：傳聞2013年年底出新機
任天堂Wii U已經喺2012年年底於歐美及日本推出，雖然初步銷售數字同當年Wii有小小出入，但時代已經唔同晒，皆因依家唔少人都只顧用手機玩Game，銷售成績當然不可同日而語。至於其餘兩個平台又點？連續好幾年都有唔少設計師幫Microsoft同Sony「設計」新一代主機模樣，Microsoft新機叫做「Xbox 720」，又話唔會再用碟裝遊戲咁話；至於另一邊廂大家都叫PS3後繼機為「PS4」，仲話呢兩部次世代新遊戲機會於2013年年底推出。照此推斷，Microsoft同Sony都有機會喺2013年6月E3時有所公布，如果成事肯定好精彩。不過玩家最關心係新機有乜實際功用，PS3跟Xbox 360推出時都正值電視開始步進高清年代，咁「Xbox 720」或者「PS4」係咪會對應4K？相信可能性不大，始終遊戲容量係關鍵因素；體感玩法就兩個平台本身都有，反而最有可能係好似Wii U咁用上有個大顯示屏的手掣，可以顯示到主畫面以外的資訊，又可以篤吓o架吓咁囉。謎底應該到2013年年中就會揭曉！
手機：大芒再變大：Huawei展示巨芒手機
科技產品一向朝「輕、薄」方面發展，唯獨近兩年智能手機例外。始作俑者係Samsung GALAXY Note，以5.3吋屏幕獲得用家青睞；到2012年中的GALAXY Note II更附上5.5吋更大顯示屏，一樣大受歡迎。這證明用家都願意用成塊面咁大嘅手機。天外有天，之前有傳下一代GALAXY Note III會配6.3吋顯示屏，差少少等如成部Tablet畫面，不過消息仲有待確認。至於超過6吋畫面手機，就居然由國產Huawei首先推出！Huawei Ascend Mate早幾日唔覺意洩露圖片同規格，手機將會配6.1吋1,920×1,080屏幕、1.8GHz四核處理器以及4,000mAh電池，機身會係幼邊框，亦無實體按鍵，預定會在CES 2013展出。呢種大芒手機通常稱為「Phablet」，因為尺寸介乎Smartphone跟Mini Tablet之間，不過6吋畫面會唔會真係大得滯呢？就好睇個人需要啦！小記可以肯定，2013年智能手機主流都會用四核處理器。
扭芒手機可望成真
至於Samsung在剛發放的CES 2013預告短片中所講嘅萬眾期待產品又係咩？有講法話係屏幕可以拗的GALAXY Skin手機。其實呢個概念喺2011年已經提過，唔知2013年會唔會變成實物呢？都值得大家期待，總好過獨沽一味加大屏幕。另外有個唔知值唔值得興奮嘅消息，係Motorola會在Google幫助下研製X Phone手機，用意係同iPhone系列以及GALAXY系列智能手機對撼咁話。老實講，摩記以前嘅Razr系列係幾好，但沉寂咗咁耐再發力就真係唔容易。
電腦：後PC時代Tablet當道：傳第五代iPad 3月推出
Apple喺發布會上講過，依家係「後PC時代」，Tablet出貨量已經趕過咗Notebook。除咗Apple自家嘅iPad同Samsung GALAXY Tab之外，Microsoft都嚟分一杯羹。好似即將上場嘅Surface Pro，講規格同功能就同部Ultrabook無太大分別，當然唔少得預載自家Windows 8操作系統。先唔講Windows 8銷售數字同預期有冇出入，但至少可以加速電腦生產商諗出新設計，令佢哋符合Windows 8輕觸畫面操作。當中也不乏創意，例如有滑蓋式、中間穿窿旋轉屏幕式、對摺式、扭轉式等Ultrabook/Tablet兩用產品。
2013年仲有冇別出心裁的新外形登場？似乎難啲。但係隨住Intel將會在2013年第二季度推出第四代Core處理器Haswell後，流動產品續航力可望提高，再加上廠方生產成本降低，Ultrabook/Tablet兩用產品價錢應可回落到合理水平。至於純Tablet方面，Android系列產品會提升顯示解像度；至於iPad方面，網上有傳產品周期會由以往一年縮減至半年（咁似「星星星」嘅？），第五代iPad更會喺2013年3月公布，產品會比第四代長闊高分別減至4mm、17mm同2mm，連帶iPad mini都會換上Retina Display。真唔真？等多三個月就知喇！
