《One Piece》手機高開八千幾 賊迷照搶！

連木村拓哉都爭住做粉絲嘅《One Piece》，不經不覺已經連載15年。最叻同漫畫Crossover嘅DoCoMo當然把握合作機會，食正劇場版《Z》熱潮，推出「N-02E One Piece」15周年紀念版手機，外觀、功能注滿漫畫元素已經無得輸，再望埋個「烈陽號」充電座，簡直靚到唔捨得用！難怪水貨價高達$8,380，都依然大把賊迷搶啦！

《One Piece》自97年連載至今，漫畫單行本已售出超過兩億本，加上動畫、精品大收旺場，論銷量及影響力早已超越《龍珠》，而成為日本人公認的國民級漫畫。人氣咁爆又適逢15周年，無理由唔推出聯乘手機，呢部N-02E One Piece日本本土僅售50,000部，連日本人都要爭崩頭抽籤先買到，因此來港水貨數量極少，Fans想買就要快手了！

寶樹阿當製成

有睇開漫畫嘅都知，《One Piece》世界是以電傳蟲來溝通，但牠們形狀不規則又超大部，攜帶勁唔方便！相反，現實世界呢部N-02E One Piece屏幕雖達4吋之巨，但卻只厚11.9mm、重147g，加上渾圓機角，拿上手要舒服小巧得多！而根據官方描述，手機是以漫畫中的「寶樹阿當」為製作材料，因此電池蓋會找到樹木紋理，而路飛更手多多在表面畫了草帽海盜團Logo，配合用烈陽號獅子頭做圖案嘅Home Button，漫畫風爆晒燈，Fans好難走得甩！

千陽號充電座

DoCoMo並非首次跟漫畫Crossover，但以往只有手機具特色，充電座只屬普通貨色。今次呢部One Piece特別版就誇張好多，隨盒附送烈陽號模型，粉絲只要跟住說明書，就可以把幾件組件合組成充電座；最抵死嘅係船上九隻Q版公仔可以拎出來，再插到耳機孔當作防塵塞使用，實用得來粉絲又可以天天換款，抵讚！另外，針對海賊航海需要，手機還對應IPX 5/8及IP5X兩種規格，防水、防塵、防跌兼防指紋，就算「偉大航路」幾咁危險都冇有怕！

角色各具功能

貴為紀念版，冇專屬內容又點講得通？呢方面手機就預載了大量插畫Wallpaper及動畫對白鈴聲，並把介面換上咖啡色，同時程式集及通話Icon又分別變成船舵及電傳蟲，單係操作已經過癮到爆！若嫌以上未夠宅？九位主角還化成獨立Widgets，只要一按就可打開不同功能，例如路飛負責開啟卷頭畫、奈美提供天氣預報、山治教煮餸、布魯克播歌、芬奇管理背景工作等等；但最搞笑還數烏索普，可射出不同植物彈與實景合成為一張相片，堪稱眾功能中毒性最濃！

SPEC

制式：GSM、WCDMA、LTE

處理器：Qualcomm Snapdragon S4 MSM8960 1.5GHz雙核心

屏幕：4吋1,677萬色TFT（800×480解像度）

鏡頭：810萬像素（後置）、130萬像素（前置）、 可拍攝1,080p影片

記憶體：1GB RAM/8GB ROM，支援32GB microSDHD卡

對外連接：藍芽4.0、microUSB、HSPA+、Wi-Fi

通話時間︰560分鐘（2G）、350分鐘（3G）

備用時間︰390小時（2G）、520小時（3G）、370小時（4G）

作業系統：Android 4.0

體積：124×64×11.9mm

重量：147g

查詢：2374 0618