無限復活HT 1/6 Scar Predator

今期政壇興「敗部復活」，原來玩具界一樣有，隨住製作技術不斷提升，近年Hot Toys就將若干舊作復活過嚟，最新例子有Sci-Fi迷勁鍾意嘅《AVP》Scar Predator，由頭雕、素體到盔甲武器都係重新雕製，將血獸猙獰一面，更傳神、更核突咁呈現出嚟。

愈核突愈多Like

作為HT最長青嘅系列之一，血獸（Predator）早於MMS系列誕生之初已經出現，編號MMS009嘅初代Scar Predator，更與Celtic Predator齊齊成為歷史最悠久嘅1/6血獸。事隔多年，以前被批評為大頭Q版嘅落伍造型，今日當然唔收貨，所以HT搵嚟生化造型師Joseph Tsang出手，為Scar Predator重新注入生命力。試辦所見，新版本比舊版確實仔細好多，正好迎合Predator粉絲愈樣衰愈Like嘅口味，隨盒附有合口及開口兩副牙骨，驚嚇度更高，亦比以前更好玩。唔想佢個衰樣嚇親屋企人？笠返個面罩就掂，後者唔只有LED，頂部仲有兩條爪痕，貫徹「Scar」之名。

蜥蜴紋最花工夫

Joseph透露，新血獸由設計到試辦完成，足足花咗四個月時間，比過往嘅血獸仲要花時間，原因出自素體係重新製作，比例、重心都要大幅改良外，最攞命係為求像真，皮膚上嘅蜥蜴紋有咁複雜得咁複雜，所以花咗唔少工夫喺人手雕琢及塗色方面。《AVP》中嘅血獸以異形做對手，武器自然有番咁上下分量，HT就準備咗加農炮、長矛、手刀及飛鏢，擺Pose應該夠晒用，不過由於戲中Scar Predator跟人類Friend咗，因此人類骸骨今次就被抽走，加上地台只係普通橢圓膠板，血腥味略嫌唔多夠。

HT 1/6《AVP》Scar Predator

零售價︰$1,480

預售價︰$1,430

推出日期︰明年第二季

查詢︰2388 4677（Toy Hunters）

＊圖中為試辦款式 ，與正式推出的版本或有若干分別。