機械忍者參上SR Volfogg & Big OrderRoom
《勇者王》可算係「SR合金」嘅銷量保證，而且款式齊全、又快又密，繼GaoGaiGar、Big Volfogg、超龍神、擊龍神等主力機體後，官方緊接炮製「GGG諜報部」嘅各款小機體，打頭陣係頭腦冷靜、身手敏捷嘅機械忍者Volfogg（港譯「保羅霍特」）。SR版本高度只有95mm，但內藏豐富關節，可動性超出預期，配合隨盒嘅1/4個「Big OrderRoom」，可玩性相當高。
可動性高 含金量低
配色跟之前嘅Big Volfogg相若，今次都用咗具金屬感嘅珍珠底漆，表面再塗上「光澤紫」，整體質感唔錯。由於機體高度只有95mm，喺超合金系列中算係相當的骰，拍得住之前合金魂嘅「忍者戰士飛影」，不過講到可動性就勝過飛影，例如膊頭有拉出式關節，幫助雙手舉前，胸腰腹嘅三節Ball Joint，就可令身體隨意前後拗動，加上髖部嘅獨立延伸關節，不受裙甲阻礙，能夠隨意轉動，仲可以做到屈腿及腰嘅大動作。不過雖然有「超合金」之名，但係Diecast物料只限受力關節及前腳掌，其餘部分都係PVC塑料，「含金量」削咗啲。
情景組件 引你入局
武器方面就有兩款Volfogg嘅專用回力鏢，一款係合體後嘅十字鏢，另一款就將十字鏢分為對稱兩件，配合多款開掌及握物嘅造型手掌，做出既自然又有力量感嘅出招甫士；就連面相都有正常及怒吼兩款，用後者嚟搭配出招甫士，就更有震撼感啦！至於隨盒跟埋嘅1/4 Big OrderRoom情景組件，有圓枱一角、站立架一支及一張司令椅，如果想完整砌成一枱，就要儲埋其他同系機體方可成事，毒性之高足以令閣下奉獻唔少零用錢。
查詢：2148 9483（精品）
Super Robot Chogokin《勇者王》Volfogg & Big OrderRoom $348
內藏豐富關節，其中髖部嘅獨立延伸關節，無阻裙甲轉動，抵讚！
雖然武器唔多，不過十字鏢都有齊合體及分件兩種選擇。
咁細隻都做到手肘雙重關節，屈臂幅度超過90°。
隨盒附有兩款面相，可惜塗裝上仲有少少甩油。
劇中Volfogg經常坐喺司令椅，跟其他隊員討論戰術，隨盒就跟埋飲品小道具。
Big OrderRoom情景組件（圖），只佔整個司令室嘅1/4，想儲齊全套，就要買埋同系嘅其他機體，條數有排計。
Big OrderRoom全套
拜可動性高所賜，可以輕易擺到神氣十足嘅翹手動作。