《iTunes 12 Days of Gifts》等收禮物

其實下載呢個《iTunes 12 Days of Gifts》有乜用？講真係無實際用途，不過唔「單撈」就走寶喇！《iTunes 12 Days of Gifts》攞正牌由Apple自己開發，同舊年《12 Days of Christmas》屬同一類別，聲稱會由12月26號「拆禮物日」起，一連12日可以免費下載特選音樂、Apps、電子書或者其他嘢，但係有限制條件，就係每個內容的下載時間都只得24小時，萬一唔記得Check個App嘅新內容的話，分分鐘會錯過着數。不過有部分電子書或音樂內容係美國iTunes先有，香港iTunes並無提供，唔知正式推出着數時，香港用家可唔可以全部用得着呢？等到Boxing Day就自有分曉。

平台：iOS 5以上

下載費用：免費

《Google Maps》終於上架

iPhone 5終於都有得用Google Map喇！早幾日《Google Maps》正式上架，iOS 5.1以上都可以用得到。相比原來iOS Google Map，新版本除咗可以透過街景服務瀏覽世界各地360度全景圖外，亦有埋語音道路導航提示以及大眾運輸路線，連顯示普通地圖都可以睇埋建築物的立體外形，真係要同Apple Map講再見！

平台：iOS 5.1以上

下載費用：免費

《Voice Translator Free》即時傳譯

出外旅行經常雞同鴨講，就算睇住旅遊書後面的有用實句都好難字正腔圓地讀出；依家只要裝上《Voice Translator Free》就可以解決問題，佢支援英文、西班牙文、法文、意大利文、德文、普通話、葡萄牙文同俄文互譯，只要揀番需要互譯嘅語文再對住手機講一句，程式就會即時自動幫你譯成所要嘅語文，唯一唔方便係一定要上住網先譯得到。

平台：iOS 4.3以上

下載費用：免費

《Grand Theft Auto： Vice City》十周年強化版

為咗慶祝PS2版推出十周年，Rockstar將《Grand Theft Auto：Vice City》帶上手機平台。以今時今日手提電話的性能來說，當然不比十年前家用主機差，所以新推出的iOS版畫面方面其實已進行強化，另外遊戲亦針對手機的Touch Screen操控而改動咗操作。有趣係iOS版《GTA：Vice City》支援到自訂歌曲，只要在iTunes加上名為「VICECITY」歌曲選單，就可以在遊戲中播放心水音樂。

平台：iOS 4.3

下載費用：$38

《Tab》同步朋友行事曆

不少人會用WhatsApp Group Chat功能去約一大班人去聚會，不過如果有乜時間或地點改動，總會有人會睇漏訊息而甩底。《Tab》就係針對呢個問題而開發，查實佢係一個有類似Group Chat功能的行事曆，可以Tag低有份參加的朋友，除了在App內討論之外，仲可以同步記低約會的時間同地點，若果有任何改動都可同步晒畀所有人知；但「單撈」佢之後，就算想推約會都推唔甩，皆因冇藉口話睇漏眼失約囉！

平台：iOS 4以上

下載費用：免費

《LINE Tools》攞你命三千

真係非常值得畀開發《LINE》嘅NAVER Japan好多個「Like」，以「LINE」名義推出的軟件既好玩又實用，好似近期的遊戲《LINE Pop》同吹水區《LINE Cafe》都真係好有人氣。最新出品仲有集十大「武器」於一身的《LINE Tools》，一個App就已經有齊各種測量工具、計時器、計算工具同埋電筒、放大鏡等十幾種工具程式，真係App界的「攞你命三千」。雖然部分Apps都幾無聊，好似「鏡子」功能只係開着自拍鏡頭，「放大鏡」只係數碼變焦拉近，而「分貝儀」更量唔到90分貝以上的聲音，但勝在集集埋埋又唔使分好多個Apps，要用時更不用慢慢搵，最緊要係免費，下載無妨！

平台：iOS 4.3以上

下載費用：免費