雲上旅程：末日錦囊‧下

我的Talk Show中派給每位到場者一個錦囊，裏面有一句末日前「應」做的事，昨天分享了一部分，其餘如下：「團購陳奕迅到家高歌一曲！」「阿媽不准食熱氣嘢，末日前狂吃炸雞炸薯片炸魚蛋！」「用全副身家兌換一元硬幣周街派，做一日大豪客！」「到北京天安門搞第一次及最後一次紀念六四。」「在新界一間丁屋，狂起八十八層！」「都末日啦，真係去走一次烽火大地啦！」

「末日前宣布香港獨立！一日都好呀！」「一齊拿大富翁的錢，到處買東西！」「將所有VHS拆散，將磁帶圍全身扮木乃伊！」「食盡引發敏感之食物，是舌尖上的末日！」「打爛手提電話，過最後寧靜的一日。」「全港市民一齊借錢，買起黃河集團！」「把海洋公園四隻熊貓放出來，真正走走港九新界。」「將家中所有植物製成一碟沙律，末日前成為一體！」「約齊所有宗教領袖一齊食餐飯，末日前大共容！」「末日前一日五餐公仔麵！香港價值嘛！」

「末日前重溫所有雲海著作，可能有所啟示！」「末日前全港市民一齊睇亞視，大破零的收視！」「全港市民一齊赤裸跳《江南Style》！」「末日時坐頭等飛機，博地面末日，地上得救！」「末日前王維基電視開台，吹脹！」這裏留空一句，你自己寫：「_______________！」