鐵鈎船長MG Gundam Age-2 Dark Hound
「海盜」唔係張保仔或者Johnny Depp嘅專利，Gundam都可以「盜亦有道」，除咗幾年前嘅MG Crossbone Gundam X1 Ver.Ka，今時今日同系仲有嘅Gundam Age-2 Dark Hound接力，雖然變形結構同Age-2一模一樣，但係個Look唔同咗，連武器都換晒，尤其是膊頭有專用飛鈎Anchor Shot；用槍、用劍，甚至用流星錘嘅高達就見得多，用鈎真係無幾何喎！
神秘海盜Look
第二部嘅「阿西姆篇」，可算係整套《Gundam Age》中收視較為理想嘅章節，所以Bandai決定添食，喺第三部安排阿西姆以海盜船船長再度登場，佢部Gundam Age-2亦改裝成黑獵犬（Dark Hound）應戰，兩者嘅機設可謂一脈相承。MG版嘅組裝結構亦大致跟Age-2相同，只係膊頭嘅機翼部分改短咗、頭頂又改成皇冠形；最大分別係機體主色由藍×白改為灰黑與暗灰兩截色，以及頭頂及心口加裝骷髏頭標誌，所以變形時，需要揭起心口嘅骷髏頭，再插入Dods Lancer先變到做機頭；至於頭頂嘅骷髏頭內藏瞄準用嘅Flash Eye裝置，MG版用一塊可動嘅透明綠色組件表達，簡單直接又傳神。
Anchor Shot變化多
除咗主體嘅骷髏頭標誌，武器方面亦大玩海盜Feel，作為機頭組件嘅主武器Dods Lancer，就由Age-2嘅炮管改做長矛而成，由射擊系變成埋身突擊之用，抵讚係採用套件式組裝，比起傳統嘅左右夾件，接合處冇咁明顯，順眼得多，不過矛頭實在太長，擺甫士有一定難度。至於Dark Hound獨有嘅鐵鈎形Anchor Shot，可以由膊頭分拆出嚟，再改成手持形態、用嚟捕捉敵人嘅震動錨，又可以加裝鐵線變成射出狀態，劇中嘅阿西姆、即係艾殊船長，就係用呢招發出高壓電擊嚟生擒對手。
查詢：2433 1828（瑞華行）
MG 1/100 Gundam Age-2 Dark Hound 建議零售價：¥4,200
拆走Anchor Shot前端嘅鐵鈎，就可加裝鐵線「駁長」，變成射出震動錨嘅狀態。
主機翼及輔助翼嘅展開方法跟Age-2有所不同，翼身亦都較短，賣相乾淨利落。
機背推進器可以加裝隨盒附上嘅骷髏頭刮貼，也可懸掛Dods Lancer。
一般高達都係綠眼睛，Dark Hound就改為黃色，又可以加裝綠色瞄準器變獨眼Look。
變形方法跟Age-2（上）一模一樣，都係拉出下半身再向後翻，跟住展開雙翼，再將長矛插喺心口變機頭。
繼Age-1、Age-2及Dark Hound之後，唔知Age-3（上）及Age FX（下）幾時又會MG化呢（圖中為HG 1/144版本）？
Beam Saber同Age-2一樣，都有一長一短嘅劍刃組件替換。