有心唔怕瓷

上星期搜集聖誕禮物做專題，在眾多產品之中，我最鍾意Wedgwood出品的掛飾，不單因為它擁有濃厚的節日氣氛，更甚是充分凸顯陶瓷工藝的美態，既有傳統的球形、雪花圖案，還有設計華麗的旋轉木馬。不過要自己掏錢（$320起）買就真係唔捨得，但若然有人送就唔同講法。老公，你收到啦！

Lum Reporter

畢業快樂！

「同學各位找個位，這是你的開學禮，望前看，想像戴着四方帽時多美麗……」經歷過無數次開學禮，終於等到今年大學畢業了！度過大學生涯的4個寒暑，雖然未能承襲李白的浪漫詩風、蘇軾的豪邁詞氣，也沒有倣效劉勰的文采。重要的是，在寶馬山上留過的歡笑和淚水，還有無數個趕功課Deadline的通頂，一切一切……在心中！最後，感激師長們過去的教導，亦祝福好友們前程錦繡！

Carol Reporter

十蚊好書

想大量掃平書，不一定要等到一年一度嘅書展，其實坊間唔少樓上書店亦不時靜雞雞有好嘢益各位愛書之人。好似位於觀塘巧明街嘅上書局，最近以開倉價益讀者，作品涉及多個不同類型，包括文化研究、政治分析、通識、動物文學、食評等，不少更以十蚊發售。我就買咗《開心牛》，呢本關於流浪牛生活點滴的相片集，由原價$99，勁減至十蚊，開倉活動加開至12月23日，快啲去喇！

WL Reporter

狂迷Big Bang

要數近來最瘋狂、最敗家的事，可算是一擲二千金睇Big Bang Alive Tour！那天下午跟同事S加埋朋友二人，一行4個「水瓶女」齊齊拎住由另一位水瓶座同事出盡九牛二虎之力買番來的頭場A1企位門票，浩浩蕩蕩到達會場。場內已有大量瘋狂瞓街排隊VIP粉絲，比較之下，我哋幾個「中女」顯得相當冷靜，但隨年華老去封閉已久的少女魂，在Big Bang五子由太空艙破門而出一刻立即甦醒，樣貌聲線再加身體律動，完美的Performance令我們失控大叫，兩個半小時好快過，狂歡的心情一直平復不了……直至今日，都平復不了……志龍、T.O.P.，你哋幾時再來？

Ivy Reporter

聖誕心機蛋糕

早前經朋友介紹，知道Patisserie Uriwari出品的蛋糕，全由店主親自製造，蛋糕的和風賣相十分吸引，食過其中兩款更是一試難忘！趁住聖誕節想買個蛋糕與親朋好友分享喜悅，原來店子最近推出聖誕限量版蛋糕─願，全人手靚料製作都只係$238。鮮紅色滑溜的外觀，加上聖誕鹿裝飾，齋睇已經相當吸引。而蛋糕以櫻桃酒慕絲加上雜莓醬及65%朱古力忌廉，再配上中及底層的杏仁蛋糕製成，這個節日甜品，氣氛添濃厚！

網站：www.uriwari.hk

Sammie H Reporter