18萬元84吋LG巨型Ultra HD TV

揀電視，當然尺寸愈大愈好，解像度愈高愈好，色彩表現愈真愈好。不過世事有冇咁完美？唔少廠商都研製到過百吋的超高清電視，但成本一部要過百萬，難成主流。至於這部正式推出市場的LG旗艦級3D Ultra HD TV 84LM9600擁有84吋極大顯示畫面，同時已經具備3,840×2,160 4K級解像度，最緊要開賣價只係$188,000，比起明年一月底正式供貨的同級Sony 84吋Ultra HD TV平$30,000，差額夠買多部50吋Full HD TV了！

倍線升出4K

之前大家都叫具4K顯示解像度的電視做4K電視，近來業界已經正式將佢定名為Ultra HD TV，即係比現時Full HD TV全高清顯示再高一級。Ultra HD TV顯示解像度係Full HD的4倍，如果用原來的影像引擎，根本搞唔掂咁多數據；於是LG這部84LM9600，便改用進階的Triple XD影像引擎，可以同時處理大量數據。睇LG自家的4K試片，歐洲風景的建築物非常細緻，色彩表現亦十分吸引。不過影音迷都應該知道，暫時4K內容甚少，買部Ultra HD TV會否得物無所用？其實透過電視內的Resolution Upscaler倍線技術，便可以利用運算功能，將全高清或更低解像度訊源「推上」4K輸出，雖然畫面不及真正4K訊源，但仍屬可接受水平之內。

自行調校3D景深深度

LG的3D電視早已經轉用FPR 3D顯示技術，即是只需佩戴戲院用、毋須入電的偏光式3D眼鏡就可欣賞3D畫面。84LM9600亦唔例外，最大好處係就算招呼成大班朋友上屋企開Party試睇大電視，配3D眼鏡的價錢都係有限數，亦唔怕睇睇吓無電咁無癮。而電視內亦已支援3D Depth Control功能，可以因應用家眼睛的構造及需要而自行調校3D效果，眼球便不怕長期受壓而睇到攰。LG 3D電視另一長處，係支援Dual Play功能，打機時可同時顯示兩個玩家對戰時的畫面，只要佩戴僅睇到左眼畫面或右眼畫面的專屬3D眼鏡（用上黑色或白色眼鏡臂作識別），兩位玩家望同一個畫面，都可以接收到唔同影像。

首配2.2聲道揚聲器

有靚畫之餘，都要有靚聲配合。今次LG就為84LM9600配上2.2聲道喇叭，既內置一對10W立體聲道單元，再加上一對15W的低音單元。好處係可以營造出更有分析力的低音效果，臨場感更強，就算唔駁影音組合都冇問題。不過話說回來，買得起84吋Ultra HD TV的用家，照計都會係極級影音發燒友，本身應已有套家庭影院組合。84LM9600亦可透過內置的3D Sound Zooming功能，根據動態影像分析景深，再模擬出不同層次的聲音，連音效都可以好3D。

除可用上傳統遙控器之外，LG 3D電視一直可用體感操作的Magic Remote來遙控電視功能，連上LG Smart TV系統，下載新Apps或玩Apps時都用得着；而且更可用Magic Remote中央位置的滾輪功能揀選電視選項，使用上亦夠方便。順帶一提，現時LG Smart TV系統已經有成1,400款Apps可供下載！老實說，LG這部84吋旗艦級Ultra HD TV價位定得夠吸引，開價比Sony平$30,000之外，供貨時間也較早，正所謂早買早享受。不過明年一眾廠商應會陸續推出Ultra HD TV，價錢可望稍作下調；當然對用家嚟講，有多啲4K內容睇先至最重要！