志龍效應

要區分「老翻」同「二次創作」的分別，就是前者着用時要鬼鬼祟祟怕畀人知，而後者則可以光明正大捧場仲驚死無人知。繼美牌SSUR「COMME des FxxKDOWN」系列被G-Dragon日着夜着煲紅後，唔潮唔着的志龍兄（Ji Yong）近日就轉捧自家品牌，將時裝品牌GIVENCHY的4G Logo「二次創作」成GIYONGCHY，身邊中晒「韓毒」的G-Dragon粉絲朋友已四處打聽邊度可以入手，聽聞連「淘仔貨」都照殺，計我話，照跟唔緊要，最緊要跟得足，好似G-Dragon本人咁用GIYONGCHY襯GIVENCHY咪直頭潮到盡頭！

Pasu Reporter

House Of Holland鬼馬Tee

自從金鐘開了LAB CONCEPT之後，我都多行咗，因為有齊我想睇嘅嘢，早排佢哋又同英倫潮牌House of Holland搞Crossover，除咗以Pop Up Store形式出現，可以買到2013年早春系列產品外，好玩在可以喺自動販賣機買到佢嘅熱門潮物，如iPhone Case、Tee、絲襪等，鬼才設計師Henry Holland仲特別設計咗啲限量版Slogan Tee，只要喺LAB CONCEPT時裝部買滿$4,000或以上，就可以免費換到。不過，我自己對件Pom Pom 人公仔Tee 比較有興趣，因為令我諗起N年前老麥卡通代言人之一的薯條「卜卜脆」。

Amy Editor

小模撒手鐧

個人最怕影童裝Styling，因為實在無佢哋咁好精力體力兼無佢哋符！箇中鬥智鬥力的過程每每花上至少三個小時！早前，小記又再次出征，與兩位小豆丁在Studio困獸鬥，慶幸兩位小模都有經驗，Warm Up一會就開始進入狀態，各自大笑扮鬼臉兼投入自戀表演！小妹妹Vanessa原來是跳舞小天后，扭腰扭個不停，最後一個Shot想佢靜靜地影，但氹極唔聽，最終使出比佢塊面還要大的波板糖，看着她邊影邊忍不住舔的可愛模樣，多不耐煩也一掃而空了！

Moe Reporter

小手工

2013年新季即將開鑼，各大小品牌的新品發布會陸陸續續舉行，希望第一時間將來年的動向逐一向記者披露，同時，品牌會藉着各式工作坊為記者帶來與別不同的驚喜。早前出席瑞典品牌Monki Press con.，便準備了「DIY小手工班」，齊齊學做皮革Tassel，只需揀選喜愛的皮革顏色，用鎅刀將完整的皮革切割成一條條流穗，經過約20分鐘捲捲貼貼便大功告成。最後，我將作品掛在袋上作點綴，又幾Good喎！

Candy Reporter