7.1聲道激戰入耳

打槍Game時想要極強嘅臨場感音效，聽清楚四方八面飛嚟嘅子彈聲，唔使大陣仗到買7.1聲道環繞聲喇叭組合，買個7.1聲道輸出的無線遊戲耳機就掂！如果係《Halo》迷的話，就一定要買特別版旗艦級TRITTON Warhead 7.1聲道耳機，佢攞正《Halo 4》License開發，耳機面同頭帶位置既有遊戲字樣同Logo外，仲送特別版DLC，價錢雖然貴，但論音效同設計都值嘅！

TRITTON Halo 4無線耳機 音效澎湃定位清晰

TRITTON Halo 4 Warhead 7.1 Wireless Surround Gaming Headset定價確實幾高，貴過部Xbox 360主機；當然一分錢一分貨，由機殼以至耳墊部分，都加入《Halo 4》主題圖案，無線發射器亦採用同樣處理，如果買埋Halo 4 Xbox 360限量版主機就最匹配！音效方面亦高水準，耳機採用50mm大型釹磁鐵單元，音色既澎湃亦細緻，爆炸聲絕不含糊，更能真正對應7.1聲道輸出，打機時可以明辨炮彈或敵人出現的方位，對Pro Gamer嚟講相當有幫助。無線傳輸系統用上較高頻的5.8GHz訊號，可以減低受到現時通行2.4GHz Wi-Fi無線訊號的干擾，傳送音效以至語音通訊都暢順到跟有線設計無分別，最遠傳送距離更可達10米。

親民有線版照送DLC

Warhead 7.1耳墊部分設計得非常柔軟，而頭帶部分亦不會箍得太緊，打足一晚都唔怕戴到耳仔痛；就算要校音量或者轉唔同EQ模式，都可以伸手在耳殼上的功能鍵一撳即成。跟機已有多一塊耳機充電池，平時可以放在傳輸底座下充電，若打到無電便可即時更換，而這耳機亦會加送「United Nations Space Command」Avatar DLC，Fans應該收貨。始終Warhead 7.1耳機價錢都幾貴，所以廠方就推出埋入門級雙聲道Halo 4遊戲耳機Trigger Stereo Gaming Headset，採用有線設計，音效表現未及Warhead 7.1，但勝在只售五百幾，亦加送《Halo 4：Forward Unto Dawn》Animated Prop DLC。

PlayStation無線立體聲耳機 耳仔感受槍林彈雨

至於PS3用家都有這款由Sony自家推出，得到官方認證的無線立體聲耳機CECHTA-0086。雖然規格未算得好強，但都可以模擬7.1聲道聲效。此無線耳機仲引入名為BassImpact的新技術，可以將PS3遊戲內的低頻音效帶動耳機上的震動體，令耳機產生脈衝，當深入戰場駁火時，聽到炮火聲之外，仲可以用耳仔Feel到震撼！這耳機並非用條狀收音咪，改為以隱藏式設計，並收納於左邊耳罩下方，有需要才取出使用，收音效果亦算得上清晰。

Gunnar專業電競眼鏡

外國Pro Gamer打槍Game時，仲會戴埋電競眼鏡，而Gunnar專業數碼光學眼鏡就有好多Pro Gamer愛用。Gunnar產品能夠有濾屏幕的藍光，特別塗層亦能有效減低眩光同反射光，並且可調整可視距離，減低視覺壓力！唔好以為電競眼鏡款式一定懶Pro，查實Gunnar有好幾款電競眼鏡款式都好有型，襯個潮Look都得！

查詢：（a）2728 9988　（b）2341 2356　（c）2763 4767