Smartphone長氣秘笈

Smartphone耗電量向來驚人，如果你成日上網、打機、睇片的話，隨時半日都捱唔住；加上最近好多4G手機登場，電量「倒水」情況就更加明顯。其實要延長手機電池嘅續航力，最直接就係用外置充電器。今次小記搵嚟專家教大家買個安全可靠嘅外置充電器。除此之外，大家仲可以從系統着手，簡單改變手機設定，或者下載慳電Apps，手機即時長氣咗，咁就自然可以玩耐啲啦！

電池選購篇：有認證最安全

外置充電器究竟應該點揀好呢？代理外置充電器產品多年的迅靈科技有限公司產品經理張裕軒（Raymond）就教大家睇兩樣嘢：「一是電池容量，以mAh作為單位；二是電流輸出，以mA或者A為單位。以iPhone 5為例，本身內置1,410mAh電池，理論上外置充電器容量超過1,410mAh就可以為手機提供額外100%電量。惟要留意，外置充電器本身亦需要電量運行，所以實際可供充電的電量可能有所消耗。另外亦要留意電流輸出，iPhone 5原裝火牛的輸出為1A，若果外置充電器的輸出低於此數值，就要花更長時間充電。」Raymond強調最重要是安全：「市面上有些不知名的外置充電器，不但誇大電池容量，電路板更有機會不設短路裝置，隨時叉壞手機甚至爆炸！建議大家揀選獲得Apple、Android認證或者大品牌的產品，安全才有保證！」

iPhone應用篇：熄4G保電量

好多蘋果迷陸續換上iPhone 5，四吋屏幕同支援4G LTE網絡都係一大賣點。雖然4G上網速度夠快，不過都有好多用家投訴轉用4G後耗電情況驚人。唔講唔知，原來4G LTE技術本身已比傳統3G技術的耗電量為多，而且暫時4G網絡未算完善，所以手機要花上更多電量去尋找或者轉換接收訊號。因此，無需要高速上網時，最好先關閉4G功能。其餘常見的耗電元兇包括Siri以及定位服務，前者因為需要長時間上網連接蘋果伺服器；後者則只適用於地圖及部分需定位的程式，長期開啟實在十分耗電，適時開關方為上策。另外，也可關閉部分同步功能、降低屏幕亮度，以及關閉iCloud同步。

Android應用篇：慳電靠Apps

每部Android手機都內置「電量」數據，按入去就可以睇到各樣功能和Apps嘅耗電狀況。一般來說，屏幕佔總耗電量約20%，所以建議大家將屏幕亮度調至「自動」，亦應減少使用動態桌布。除此之外，Android會預設將Gmail、聯絡人、瀏覽器、Picasa等與帳戶同步，用家可以適當地關閉其同步功能；惟要留意，關閉同步有可能影響推播的功能。而Google Play入面有唔少慳電Apps，其中《JuiceDefender》就最受用家歡迎，因為它內置不同的慳電模式，最重要係識得於電量不足或待機時自動關閉流動數據和Wi-Fi，甚至將手機處理器降頻，大減耗電量，夠晒實用！小記再醒你其他慳電小Tips，一於限制背景數據、關閉震動回饋，以及關閉GPS吧！