Figure搬新竇！

小記家中1/6 Figure愈來愈多，睇住佢哋膊頭貼膊頭咁企到密質質，猶如人肉沙甸魚，着實於心不忍；因此日前趁有少許餘暇，就抽空到「姨媽傢俬」幫佢哋買番個新竇。千揀萬揀，終於畀我遇到呢個叫Detolf嘅飾櫃，佢最大賣點係四面都用強化玻璃製成，Figure放入去就能看到它的前後左右，簡直是為Show Off而設！當然，它的用料、尺寸不及玻璃廠DIY咁堅固和貼身，但售價不到一千元，仲想點？下一步就要到鴨記買番幾條LED燈帶，等Figure櫃有咁閃得咁閃！

Gilbert Reporter

有折扣先捨得買

有同事喜獲「新平衡」七折優惠券乙張，千載難逢，眾人一起購物去！小編都唔蝕底，一於買跑步背心加條跑步褲。既然有折扣，揀全店最貴那款是常識吧！老老實實，這樣子薄如蟬翼的背心和短褲，無折頭的話，加埋幾乎要八舊水，保證肉赤。現在盛惠$516，其實不算平，勝在自我感覺良好。最過癮的是，那條跑步褲後袋裏有條螢光膠帶，給你寫低緊急聯絡資訊。不過，這Detail位收藏得如此秘密，萬一遇上甚麼「大吉利是」時，會有人發現嗎？

Tony Editor

東京沾麵記

近年愛上沾麵（Tsukemen），每到東京都一定幫襯麵屋武藏食碗武藏沾麵，¥1,000大大碗沾麵兼加上兩塊非常入味的豚角煮同半隻蛋，仲要睇住師傅們邊叫「O-shu」邊煮麵，好有氣勢。沾麵分量本身已經唔細，如果好肚餓的話，仲可以加到「大盛」，麵條多到座山咁，而且唔使另外加錢，食完超級滿足！上兩星期咁啱幫襯新宿太子酒店行入去幾分鐘嗰間，晏晝十二點幾人龍已經排到出門口，畀着喺香港，已經掉頭走咗！結果本人排咗20分鐘先有得食，食完剛好搭巴士去機場返香港。呢間拉麵店香港都有分店，同樣有沾麵食，好唔好食就由大家試過再判斷，但係我就寧願喺東京排隊食囉！

Brian Reporter

高達立於Billy上

大家冇眼花，我都係講櫃。圖中係筆者寒舍客廳，小記既係模型迷，亦要寫Hobby版，所以屋企擺滿自己砌的高達作品。自從自置物業後，終於可以實現「玩具屋」的心願。不過模型一直砌，自然會冇位放，有見及此，早排亦都係走去「姨媽傢俬」添置個Billy單邊書櫃擴充「規模」。Billy櫃雖叫做「書櫃」，但纖維板構造放重書有點勉強，反而放Figure合金就更加適合，好多玩具迷都鍾意買嚟擺心頭好，加上千元有找，超抵買，淨係我屋企都已經有四個Billy喇！

Alfred Reporter

藍光重溫鐵金剛

小記是007鐵金剛迷，新片《新鐵金剛：智破天凶城》已經買定戲票，一於先睹為快，但在睇新片之前，當然要溫故知新，重睇心水邦片。為了享受最靚畫質，還專程買了藍光版，有辛康納利的《鐵金剛勇破火箭嶺》、羅渣摩亞的《鐵金剛勇戰大狂魔》、皮雅斯布士南的《新鐵金剛之金眼睛》，還有最新一代丹尼爾基克的《新鐵金剛智破皇家賭場》。至於剩下兩位占士邦真是興趣不大，等有閒錢時再買藍光版吧。回想當年電影公司揀選丹尼爾基克為最新占士邦時，真是柴台聲四起，既樣衰又年老之指摘聲不絕於耳，但《皇家賭場》一上映，即時由彈變讚，拍吓拍吓仲拍到第三套邦片，可見觀眾是善忘兼善變的。

Angus Reporter