《Real Soccer 2013》球迷必備

上星期日早場愛華頓逼和利物浦，夜場車仔苦戰曼聯，場場波都咁熱血，即時激發小記嘅波癮。想踢波未必一定要落球場，皆因最新嘅足球遊戲《Real Soccer 2013》都登陸咗手機平台。今集唔單止代言人由韋拿轉為法卡奧，就連玩法都有改變，用家要先揀球隊，再慢慢搞球員轉會、興建球場、訓練球員等等，都好襟玩，Android用戶唔使再等《FIFA 13》喇！

揀球隊玩發展

同上一集《Real Football 2012》唔同，今集遊戲改以類似育成的玩法。用家要先揀選一隊球隊，一開始隊員都係雜牌軍，通過訓練就會提升能力，而且贏波後又可以賺錢買球員、建球場，十足十班主兼教練。除咗管理球隊，玩家仲要落場打埋一份，操作都同上一集差唔多，不過畫面質素及流暢度都有所提升，整體都幾好玩。最可惜是遊戲取消了一般比賽模式，搭車想打番一場半場都唔得，不過免費下載仲想點？

下載費用：免費

支援平台：Android 2.3、iOS 5.0

《Little Empire》城堡帝國

有讀歷史都知，要保護及壯大自己嘅王國，戰鬥抗爭、對外擴張呢啲招數就絕對唔少得。遊戲《Little Empire》入面，就畀你化身成帝國英雄，用頭腦、技術來擊敗敵人，逐步發展領土，最後締造宏大帝國！

行軍布陣要食腦

要做帝國英雄當然唔係咁簡單，玩家最先要喺鐵牙巨獸、雙刃狂徒及魅魔三個角色中選其一，三個角色都各有不同屬性及招數。揀好之後就可以喺所屬領土內開採金礦同興建各種建設，用來賺錢替人物及帝國升級。最好玩是玩家控制嘅英雄要不時挑戰不同對手，包括海龍巨炮、狂暴巨猿、魔龍等Boss以及不凍港、暮雪城、百葉泉、火溪谷等總共263個關卡；玩家更要將不同類型的戰士、士兵行軍布陣來攻擊或防守，稍一不慎隨時戰敗收場，玩法極具戰略性。而且遊戲仲已經支援iPhone 5，可以全屏幕咁玩，感覺正好多。

下載費用：免費

支援平台：Android 2.2、iOS 4.3

《PPS on Mobile》手機繳費

好多朋友都鍾意用PPS繳費，貪佢夠方便。不過方便冇人嫌多，最近PPS就推出咗App版本，介面比網上版更清晰易用，並可以隨時登記帳單、繳付帳單或者查詢繳費紀錄，啱晒忙到暈嘅上班一族。

下載費用：免費

支援平台：iOS 3.1.3

《Letterpress》拼字遊戲

英文拼字遊戲歷史悠久，玩法雖然冇乜特別，不過勝在益智，小朋友都啱玩。屬同類遊戲嘅《Letterpress》就啱啱喺AppStore上架，考大家對英文生字有幾認識；最正係可以透過Game Center同網上對手鍊過，都幾有挑戰性！

下載費用：免費

支援平台：iOS 5.0

《Screen Filter》屏幕唔刺眼

小記最近臨瞓前鍾意用Android手機喺床上睇漫畫，奇在無論我校到屏幕亮度幾暗都依然太光猛，好在有新App《Screen Filter》幫手，佢會模擬Screen Filter效果，令屏幕可以恍如有一重紗濾光，用家又可以自行調校光暗度，夜晚睇書就舒服得多！

下載費用：免費

支援平台︰Android 1.6

《Zombiewood》大街射喪屍

雖然過咗萬聖節，不過喪屍遊戲向來有大把粉絲。Gameloft最近就有新作《Zombiewood》，玩家可以操控角色喺街道瘋狂射死喪屍，仲有多達20種武器，畫風又過癮，必玩！

下載費用：免費

支援平台：Android 2.3、 iOS 4.3