on.cc 東方互動主頁

遊屏山Stepwgn Spada最識慳

放假睇戲、行商場，似乎行貨咗啲喎，倒不如走出石屎森林，到郊外吸收陽光氣息，為身心Relax兼叉電之餘，順道發掘香港的另一面，元朗屏山文物徑保留唔少古色古香嘅中式建築，部分已有數百年歷史，可以順便認識香港歷史。親朋好友齊齊去的話，可以坐足七個人嘅Stepwgn Spada 2013就大派用場。

食量低至14km/L

今次出動嘅Stepwgn Spada屬於2013年車款，車身內外都全面升級，包括原廠Spada包圍、17吋輪圈及LED燈組，動力方面源自2.0公升i-VTEC引擎，馬力及扭力分別有150ps及19.7kgm，連同筆者、攝影師、模特兒及兩名代理職員，載住六名成年人上大斜路依然好力，加上波箱齒比經過重新調整，加速平順又可降低耗油量；代理指出Stepwgn Spada已獲政府認可為環保汽油私家車，可享稅務寬減優惠，以現時日本最新嘅輕型汽車測試標準JC08計算，耗油量可低至14km/L。

空調製冷效率高

為咗提供豐富嘅行車資訊，錶板速度計旁邊加入Multi Information Display，顯示23項提示及重要資料，邊道門仲未閂好都會清晰顯示，相當User Friendly。拍攝當日熱到33℃，烈日下熄車曬半個鐘，車廂溫度升到40℃以上，好在空調系統製冷速度快，加埋後排有獨立送風口，開盡冷氣後兩、三分鐘，車廂已經迅速降溫，坐後排都唔覺焗。而且隨車設備非常齊全，每個座位都有升降頭枕外，又連埋天幕式天窗、雙電趟門、智能感應遙控車匙、自動感應頭燈及Idle Stop系統，扣除環保稅務寬減後，車價只係$329,880，頗有競爭力。

屏山文物徑長約一公里，沿途都有路標引路，又有資料板介紹古蹟建築，慢慢行、影吓相，足以消磨兩、三粒鐘，而且地勢平坦，大人細路都啱行。屏山文物徑位於西鐵天水圍站對開，若果揸車去，聚星路屏山文物徑入口旁就有露天停車場，設有大量時租車位，唔使為搵位煩惱。至於毗鄰停車場嘅起點聚星樓，係本港現存嘅唯一古塔，據講已經有超過六百年歷史，係沿線12個重要地標之一；終點就係屏山鄧族文物館暨文物徑訪客中心，館內設有屏山鄧族文物館、屏山文物徑展覽室及社區文物展覽室，透過多項歷史文物，展現原居民生活嘅歷史片段。