火火 熱戀女神

「佢鍾唔鍾意你係一回事，但你點都要追，頂多追唔到，唔使死嘅！」有鋪追女仔癮的舞台劇及電影導演火火，言談間多番陳述追女心得，而他心目中的女神是可望而不可及，她既浪漫、婉約、又瘋狂冒險……注定只可擔當夢中情人，無他，只怪很多人喜愛待在Comfort Zone，沒勇氣踏出第一步，更不相信自己有能力與她創造一輩子的幸福。或許，你願意放棄心中的女神，但火火斷言不會，她的女神就是「電影」。

最愛《英雄本色》

火火對電影的愛慕始於少年15/16時，「嗰陣香港啲戲院平日都有深夜4點場，我最主要嘅娛樂就係買包煨魷魚入去，即使第二日要7、8點起身返學，我都係幾乎晚晚去睇戲。」那年頭午夜場、子夜場都以翻播電影為主，即使影片不斷重複，依然無損火火看電影的心情，以《英雄本色》為例，不論正式上映或重播，他至少看過8次以上，「這是我最喜歡的電影，還有其他福星片……」少年的火火抱着一概全收的態度，只要是電影，統統愛。

一起頹過的日子

十個愛電影的人，九個都是讀不成書。唉，作為制度下的孩子，大學之前都沒有選修電影科的權利，更何況自問由細到大唔鍾意讀書的火火，講明會考只為應酬媽媽全科合格，更曾一度因女友離港到美國交流一年，情緒低落而變成頹廢青年，「我最頹嗰陣試過除咗去廁所、落街買煙買酒外，可以一個星期冇落過床，日日只係等電話。」無法想像的頹廢生活維持了一年，直至女友回港後逼火火報讀社區中心的戲劇興趣班，才助他尋回人生方向，「其實我嗰時係諗住上堂識女仔（笑）。」感情氾濫的火火當然沒有識到新女友，卻與戲劇交上真心，「第一次發覺原來我會聽書！我仲係最後留守的4個學生之一。」

雄心壯志入演藝

決心發展演藝事業的火火，繼續發揮你估佢唔到的精神，去海洋公園投考小丑！「讀完戲劇班個人好『餓』，好想吸收多些表演經驗，咁啱一打開雜誌就見到海洋公園開辦小丑訓練班，於是又去試吓。」不再頹廢的火火為爭取受聘機會，刻意於事前兩星期認真準備表演項目，學拋波、做默劇，務求一擊即中，「第一次相信，勤力是有希望的。」

完成訓練班後，有着對戲劇的雄心壯志，在他人眼中「讀唔成書」的火火就憑一個月的小丑經驗，膽粗粗投考香港演藝學院。眾所周知學院收生少、要求高，會考只得6分的火火卻不怕被比下去，心口掛着「勇」字便勇往直前，「好好彩學校真係收咗我！」幾時都話：肯試，就有機！

初遇女神不對辦

由頹青到演藝畢業生，火火逐漸步入真正的電影世界，昔日遙不可及的電影「女神」此刻就在眼前……「吓！乜原來我個女神講粗口o架？」火火由特約演員做起，目睹真正的影圈不如想像般浪漫唯美，鏡頭後眾生醜陋的嘴臉表露無遺，不過這些血淋淋的事實，更加堅定有心人的方向，火火以女神作喻，「事實上依家嘅女神係會講粗口o架喇，咁睇你願唔願意留喺佢身邊，但佢未必需要你，只能問你自己係咪真係好鍾意佢。」認清自己的心意，比擔憂其他外在因素更重要，皆因人性間的爾虞我詐不只發生在影圈，火火堅信只要做好自己，無懼任何挑戰。

吊鹽水式收入

創作這種「三更窮，兩更富」的職業，於投資人生的角度而言，屬超高風險類別。「當初做演員係諗住做導演！我覺得自己的理論到依家都仲Work的：導演要識做戲。」為求累積演出經驗，當年簽約馬偉豪旗下做特約，意外結識了森美，碰巧其歌劇團缺人，火火竟大膽跟對方說：「我未聽過森美小儀歌劇團呀！亦未做過導演，我係有興趣試吓，你夠膽搵我咪導囉！」不成功，便成仁，夠Guts的行為最後造就了一部部精彩作品。

火火當初由創作舞台劇開始，到憑《老馬有火》獲提名香港舞台劇獎最佳編劇，更加入歌劇團做導演，故事發展應是一帆風順的開始，怎料同時亦是踏入人生低潮的序幕：「被提名後無人搵我寫劇，我都唔知點解，雖然有得做森美小儀歌劇團，但一年一次邊夠搵食？收入減少的確好擔憂，但每次山窮水盡時，又會有人打嚟話搵我做嘢，於是又繼續留低，這種吊鹽水式生活持續好幾年。如果唔係馬偉豪搵我，真係打算跟阿媽返內地做製衣廠就算。」正因馬偉豪找他試做電影《蠍子》編劇，敢作敢為的火火愈做愈有火，2009年更夥拍合導《愛得起》，正式實現導演夢。

唔盡力有咩好玩？

觀火火的創作之路，由編劇提名走到擁有個人電影作品，每三年攀上新境界，既能參與森美小儀歌劇團，又有恩師馬偉豪從中提攜，外人總覺得是火火夠運。常言機會是留給有準備的人，但火火更相信是留給相信自己能力的人，「要信！信自己有能力做得到，好似嗰個女仔當初唔鍾意你，你咪去充實自己，然後返去同佢講：你鍾意我啦！如果佢都係唔鍾意，咪再努力囉！佢見你咁上進，話唔定就肯同你去吓街囉！」只要對自己有要求，為每次機會全力搏盡，無悔便是快樂，「唔盡力有咩好玩？既然唔知下次幾時有演出機會，就當每次都係最後一次，咁樣用盡自己精力去做先會開心！」人生短促，需要燦爛地燃燒才不枉此行。

後記：尋根究柢

當初小記被電話裏的火火謝絕訪問，計劃擱置，忽然竟又有機會訪問，但火火聲稱從無接聽過小記的來電！算了，下台階的說話比比皆是，小記都是說說便算，怎料見面時火火竟然執着要「搞清楚件事」，結果發現……小記當日打的手機號碼是錯的！（天呀！當日是誰拒絕了我？）頃刻放下心頭大石的火火，立即放開懷抱受訪。這樣尋根究柢的性格，確令人眼前一亮。原來，也有沒架子的導演，哈！

About火火

原名李家榮，身兼舞台劇及電影導演、編劇、作詞、客席電台節目主持等多重身份，早年曾參與舞台劇作50多部，包括森美小儀歌劇團的作品《BIG NOSE》、《早安啊！曼克頓！》及後與Otto合夥61制作，作品包括《愛可以多狗》、《黐膠花園》等。近年涉足電影界，2009年與馬偉豪合導《愛得起》及今年推出個人導演新作《等我愛你》。