on.cc 東方互動主頁

倫敦直擊！機王Galaxy S3話頭醒尾

唔知係咪都市人寂寞得滯，鍾意同機器對答多過同真人，iPhone Siri是一例，最近大熱嘅小學雞《SimSimi》亦是一例。Samsung向來緊隨潮流，倫敦發表嘅新機王Galaxy S3就喺4.8吋HD Super AMOLED屏幕、1.4GHz四核心處理器及990ms極速快門等強勁規格以外，加入「S Voice」語音識別功能，出句聲就自動幫你開機、查天氣兼打電話，方便到震！3G版最快今個月尾歐洲上市，4G則在暑假，屆時見到成街人喺度自言自語，就千祈咪當人傻仔喇！

根據市場調查，Samsung已超越Nokia成為現今手機界一哥，單係今年首季，其出貨量已超過9,000萬台，當中又以GalaxyS2賣得最好，推出僅僅十個月已賣出2,000萬台，數字驚人！GalaxyS3貴為後繼機，宣傳攻勢當然更加強勁，日前廠方就邀請全球過千記者到倫敦出席「Unpacked」發布會，介紹新機王S3有幾勁，當中又以「S Voice」功能贏得最多掌聲！

語音辨識快夾準

用開Android嘅朋友一定玩過Voice Search，簡單講兩句就幫你自動搜尋。S3嘅「SVoice」係強化版本，它除了可以幫你查天氣、查資料，還能透過語音指令來播歌、控制音量、發送短訊、叫熄鬧鐘甚至開啟快門。小記現場實測，即使在嘈吵環境下，辨識率都相當高，而且資料還相當Update，例如問「Whois Lady GaGa?」，它毋須3秒就能自動搵出她的最新相片和資料，勁爆趣！惟留意現階段它只支援英、德、法、意、韓等八國語言，港式英語（Chinglish）未必聽得明，期待日後能追加廣東話或普通話版本啦！

首見手機畫中畫

說到機身，跟S2玩稜角好唔同，S3外形激似Galaxy Nexus，同樣採用渾圓機身，並符合人體工學設計，加上僅厚8.6mm，現場試過勁好揸手。另外，上代用色非黑即白，S3就在大理石白之外，追加一隻卵石藍色，配合全新具拋光感嘅HyperGlaze機殼物料，令外觀更添幾分藝術感覺。外形靚仔，屏幕亦採用了4.8吋HDSuper AMOLED，符合16:9比例並提供1,280×720解像度，睇片靚爆鏡！特別一提，它還新增了一項名為「PopUp Play」嘅新功能，用家可在上網或打SMS的同時，透過微縮屏幕繼續睇片，用法猶如電視的畫中畫，手機中首見！

四核心鯨吞128GB

今年係四核心年，S3當然唔落後，內置1.4GHz四核心處理器及780MB RAM，行Benchmark得分比雙核心Galaxy Nexus高出近乎一倍，誇張！另一厲害之處係記憶體容量有64GB選擇，若配合64GB SDXC卡的話，總容量最高就可達128GB，真係幾多高清片都裝得落！鏡頭算係較失色一環，僅得800萬像素，未免太低，幸好其他方面加番分，例如支援990ms快門啟動、20張連拍及「Best Photo」自動揀相等，加上前置鏡頭有成190萬像素，自拍友必定鍾意！至於其他功能，包括拍一拍機即能過資料的「S Beam」；可把畫面無線傳至大電話視的「AllShare Cast」；以及點一點朋友大頭相，就能撥電話的「Social Tag」等等。