車廂香噴噴零舍多人愛

好多人都話，有部車，追女仔都易啲，不過唔係有車就大晒，平價車定係貴價貨、個Look有型或者薯嘜都唔係最重要，攞命之處係車廂處處有異味，恍如流動毒氣室嘅話，仲點會有人肯上車、活受罪？唔想咁樣，除咗要勤加清潔車廂外，如果放多個車用香精傍身，點只心儀女士，直頭大人細路都想搵你做柴可夫。

車用香精味覺視覺兼備

今時今日嘅車用香精，點只香噴噴，仲充滿各適其適嘅外在美，放喺車廂當堂生色不少，尤其更可作為傳統黑色車廂的醒神點綴。

賣相成個燈泡咁款，外殼係磨沙面處理，十足一件有趣家品，相信唔少女車主都會鍾意。售價：$55

風口位往往係異味源頭，呢款香精夾就專門夾喺風口位，而且體積小巧，唔怕阻碇。售價：$68

單憑外表，以為係日本歌星嘅CD？實情係CD盒形香精，攝喺門邊嘅置物位，就可散發陣陣香味，實用又唔覺眼。售價：$55

造型似足某知名連鎖咖啡店嘅外賣杯，不過其實係一款車用香精，咖啡迷見到實會會心微笑。售價：$55

象徵神秘、詭異嘅骷髏頭，唔只係時裝設計嘅熱門題材，做成香精座一樣有型有款，最啱大膽、破格嘅車主口味。售價：$78

除咗新款香精座推介，今期推介就連門邊及泵把都照顧埋，事關日常泊車時，無論係自己唔小心，或者畀鄰車揩到，呢兩個位都會首當其衝被刮花，唔想心痛？其實簡簡單單加塊防撞貼就可以解決問題。

大力開門唔只會刮花自己部車，仲好易撞及鄰車，為人為己，除咗要戒掉惡習，加埋呢款防撞貼就更穩陣。售價：$50

揭背車專用，貼咗之後，就算喺樓底較低嘅揭起尾門，都唔怕又再撞到天花而刮花門邊啦！售價：$62

頭泵把角位最易出事，就算冇畀其他車揩到，都可能被路面嘅沙石打中，呢款產品起到「護駕」功效。售價：$78

喺空間偏窄嘅停車場泊車，倒後鏡往往係刮花嘅高危熱點，好彩有呢款橫條形防撞貼幫手，咁就放心晒啦！售價：$75

唔少車主都會Load低部車，搞到頭唇成日掂地刮花晒，既然花得錢改車，又何妨使多少少加多塊防刮膠邊呢？售價：$140

查詢：2392 4244（台日汽車精品）

Samuel