《Max Payne Mobile》黑幫大作

都幾難想像當年的PC大作《Max Payne》，今時今日竟可以在iPhone上面玩到。入App Store一睇，呢款《Max Payne Mobile》內容竟然高達1.11GB，可想而知遊戲製作有幾咁認真，但下載費用又比想像中平，只需US$2.99，實在相當抵玩，值得下載試試。

1.11GB容易製作認真

雖然要在iPhone上百分百做到PC Game嘅水準就確實較難，但場景同動作都表現得幾細緻，而故事係承襲自PC版。由警探主角Max Payne見妻兒被毒梟所殺，加入做臥底時又唔小心殺死同伴，結果被黑白兩道追殺，到加入另一黑幫做小混混開始復仇大計。

型到震Bullet Time

本身好受《英雄本色》影響的主角Max Payne，經常都會示範型到震的跳起開雙槍絕技。PC版時成名招式Bullet Time亦保留到Mobile版之上，可以將時間校慢等大家瞄準敵人發射。Mobile版亦支援多點瞄準功能，要殺敵都無咁難；但係黑幫敵人經常大堆頭出動，要善用止痛藥同埋殺死壞蛋換Bullet Time先可以保住條命仔。iOS版會先推出，到4月26日就會出埋Android版本。

支援平台：iOS 4.2或以上

下載費用：US$2.99

《LINE Camera》超多特效

《LINE》近來好積極，早幾日又推出新Android影相程式《LINE Camera》。Google Play上面都已經有好多影相程式，《LINE Camera》有幾特別先？首先佢相框同裝飾標籤特別多，程式內提供超過100種唔同相框同600種標籤，要加入可愛抵死的圖畫同製作Funny圖片都話咁易，當然唔少得有LINE招牌式卡通人物頭像啦！

備大量畫筆相框標籤

另一抵讚係內置大量濾鏡效果、字形同畫筆，唔想用罐頭圖案設計，都有大把選擇。《LINE Camera》內置14種獨特濾鏡效果，另外亦有156種唔同畫筆同包括繁簡中文在內的字形，在相片上加字都一樣容易。

分享給《LINE》朋友

唔使審都知，此App當然係可連結《LINE》同朋友分享咁Funny的相片，不過若然朋友無《LINE》都唔怕，程式亦可將加工後之相片分享到Facebook、Twitter或微博等社交網站。唔知遲啲會唔會追加iOS版呢？

支援平台：Android 2.1或以上

下載費用：免費

《Dream:On》 代你發夢

近期其中一個iOS話題App就係《Dream:On》，下載安裝後，只要在睡前擺在枕頭旁邊，就可在大家入睡後進入大家預設之夢境，認真神奇！用家評語話成效各有唔同。隨App附送兩個夢境，免費試吓又無妨。如果想發其他好夢就要畀錢買夢境了！

支援平台：iOS

下載費用：免費

《Epic Astro Story》外太空Sim City

Kairosoft出品嘅模擬遊戲已係信心保證，本來Android先有的《Epic Astro Story》終於登陸iOS平台。遊戲類型跟前作《Oh! Edo Towns》及《Venture Towns》差唔多，都係模擬城市式起樓鋪路玩法，不過場景就變成外太空殖民地，都幾有新鮮感。

支援平台：iOS 3.1或以上

下載費用：US$3.99

《Phase 10》即時開局

如果識得玩「Phase 10」這個流行已久的Card Game，就可以下載Android版《Phase 10》，唔使湊齊人腳都可以開局。遊戲設計得幾Funny，有15個Avatar可以選擇，想試吓好唔好玩亦可下載免費版，有3個Random Phase可玩。

支援平台：Android 2.1或以上

下載費用：HK$7.69

《Dream Heights》Add Friend起高樓

起樓手機遊戲都有唔少，大廠Zynga都嚟分一杯羹。遊戲入面可以建造到零售商店、商店同餐廳都係指定動作，最重要係Add Friend齊齊玩，Call班朋友過來自己棟大樓Shopping，仲可以同巴黎鐵塔、自由神像比吓邊個高啲！

支援平台：Android 2.2或以上

下載費用：免費