heroesunited動漫街 粉絲搶踩場

本地薑電腦周邊配件品牌MW集結旗下多款美日動漫英雄，以「一店一英雄」的創新零售概念，喺觀塘東廣場開設全港首條動漫Gadgets街，分門別類地售賣至新人氣Gadgets。另外，同場亦有間「高達主題屋」，將自家高達產品融入家居布置中，仲要開放畀公眾任影唔嬲！加埋其他本地人氣品牌作精品寄賣，啱晒復活節假期拖男帶女齊齊逛，如果你係動漫粉絲，直頭唔去唔得！

主題店產品豐富

heroesunited動漫街現時共有6間主題店舖，最近扶手電梯的就是Gundam主題店及DC Comics主題店。其中Gundam主題店門前就有兩大玻璃櫃展示了最新周邊Gadgets，由MiniPC、滑鼠鍵盤套裝到USB手指，又有手機殼、電話繩、喇叭仔等等。最近更有日系高達潮Tee上架，必搶。至於旁邊相連幾個舖位，打頭陣有DC Comics主題店，裏面售賣Justice League陣營如超人、Batman的USB、外置硬碟、耳機等配置；隔籬的Marvel Comics主題店也展出最新發售的Fantastic Four漫畫封面造型USB，更有等身大Iron Man任人拍照留念。加上仲有米老鼠特徵做噱頭的Notebook袋，以及幪面超人型格黑魂iPhone Case，兼配埋電單車電話座，相信粉絲們勢必破財！

高達主題屋任影

行到轉角位，大家必定會被一間黑麻麻、重科幻口味的「示範單位」深深吸引。此乃MW以自家高達Gadgets擺設所打造的「高達主題屋」，入面除展出各式以機動戰士機體特徵造型設計而成的數碼產品，如早前推出的MiniPC、Gaming Mouse外，更有以聯邦軍、自護公國等徽章設計的餐具擺設，放在一張型到痹的餐桌連餐椅上，坐上去真係忍唔住大叫：「阿寶，出發！」此外，小客廳又放置了一個模型櫃、遮架又掛住專用衞衣以及會發光的雨傘，簡直是宅男至愛！最重要的是主題屋乃開放予公眾，只要大家有公德心，官方絕對歡迎各位入內「留倩影」呢！

INFO

地址：觀塘成業街7號東廣場1/F，103A、105-109、132、142舖

開放時間：上午10:30至晚上8:30

查詢：2341 8766