你呃人！

小記個個星期都喺度介紹Apps，假如啲Apps沒有想像中咁好玩，你會否心中暗罵一句「你呃人」呢？不過呢度係我主場，就算你有N年玩Apps經驗，都暫且先忍讓吓。嗱！過兩日就係愚人節，今次小記真係可以打正旗號教大家幾招「呃人」伎倆，只要有部iPhone就掂，又即管睇吓可唔可以喺4月1日大派用場，同朋友一朝早詼諧吓。

有埋現場聲：《Fake Call Locations》

下載費用：US$0.99

要成功呃到人，有橋段、有損友夾晒計之外，有埋「環境證供」就天衣無縫了！《Fake Call Locations》能為大家提供及模仿寂靜的教堂、喧鬧的賭場或危急的狂風暴雨等15種不同場景聲音，如嫌不夠的話，更可自訂錄製5種效果，用嚟耍朋友老點佢去某地就至啱！

地點任標：《Fake Location》

下載費用：US$0.99

甲說：「美國？上年去過啦！仲有打卡添！」

乙指摘道：「你講大話！我記得上年你講過話打死都唔去！」

雖然大家也不知道以上對話誰是誰非，但「打卡」其實已經不是甚麼有力證據。點解？因為iOS已有《Fake Location》這類偽打卡軟件，可以展示地點之餘，有齊晒經緯度、街名和門牌等詳細資料，真係幾可亂真，整蠱人或裝神弄鬼最啱。

隨時變軍佬：《FakePhoto Lite》

下載費用：免費

軍人形象威猛，不然又怎會這麼多男生愛玩War Game和購買軍服穿上身？如果想一嘗變身軍佬順道拍攝的話，免費的《FakePhoto Lite》即可為大家提供四款不同軍人服式人像，並能把自己的面孔Key上，再加上可調校膚色深淺，效果更自然醒神，即時變身英勇戰將。當然，大家可以用佢嚟惡搞改圖啦！

力牆再造：《Fake the Weather》

下載費用：免費

想呼風喚雨，隨心掛上不同風球，怕且大家這生也做不到。不過一時權宜之計，偽造假天氣報告，推掉不必要的豬狗朋友約會則還可辦到。所說的就是《Fake the Weather》，軟件內備有天氣、溫度、日期和地點等選項可以調校，咁就唔使次次搬「陪雙親食飯」咁冇新意啦！

搵鬼嚇人：《Ghost Capture Free》

下載費用：免費

「清明時節雨紛紛，見到有鬼就嚇親人！」撞鬼幾時都令人動魄驚心，在這有圖有真相的年代，如果有相為證就勝過繪形繪聲了。《Ghost Capture Free》就提供一個嚇鬼機會，啟動手機，鏡頭畫面會慢慢飄出半透明的「鬼魂」，配合嗚嗚的低鳴哀叫聲，玩時已十分恐怖，將相片拍下再轉送給朋友，就將愚人節變盂蘭節！