雙卡雙待　長傾長有

仲有幾日就到四月，清明節加復活節咁多日假期，最好梗係籌劃番個短Trip，離港幾日鬆一鬆開心吓。呢個年代香港人手機不離身，好多人去短Trip索性帶部Smartphone影相兼當電腦用嚟上吓網。咪以為iPhone可以一Take搞掂，遊戲、影相Apps佢就誇啦啦，但講到離線地圖、雙卡雙待呢啲出門有用嘅功能，都係要靠其他手機。今期小記就為大家介紹一啲出門專用嘅手機同Gadgets，等大家有個概念，多個選擇！

Choice 1：GALAXY Y Duo 雙卡網遊

一到外地，少不免要用吓漫遊，想慳番啲長途電話費，不妨帶定部雙卡手機。Samsung最近就推出大廠少見嘅雙卡機GALAXY Y Duo，SIM 1、SIM 2同時支援GSM四頻以及UMTS制式的網絡，香港、內地以至世界各大城市都有網絡商支援到，買多張當地SIM卡同時待用就最好不過。雖然兩SIM同時待機，不過操作都幾簡單，只要拉下狀態欄就可以隨時切換主卡，畫面右上角仲會獨立顯示兩個接收圖示，加埋每個SMS、來電記錄都有「1」、「2」做識別，包保唔怕混淆！

3G上網都得

除咗雙卡撥號之外，新機最犀利就係兩張SIM卡都支援HSDPA 3G上網功能，就算身在外地都可以隨時打開「面書」將靚景、晒命相同朋友分享，肯定人人Like爆！此外，新機只會使用主卡的流動數據，亦可透過內置的「SIM卡管理員」將流動數據服務暫時關閉，咁就唔驚因為數據漫遊而收到電訊管理局所講嘅「帳單震撼」啦！值得一提的是，雖然GALAXY Y Duo只屬平價機，但就有齊Android 2.3.6系統同自家的TOUCHWiZ介面，用落順暢又唔窒；美中不足的是，其3.14吋屏幕的解像度只得240×320，網頁細粒字以及圖示唔夠細緻！

Choice 2：Nokia Lumia 800 WP地圖王

喺外地最好有地圖傍身，不過大家用慣用熟嘅Google Maps要上網先用到，身處海外有時難免失諸交臂。Symbian年代已經玩離線地圖嘅Nokia，最近就將離線導航新App《Nokia導航》加到新機Lumia 800。此App備有點對點導航功能、免費語音導航服務及車速限制提示等功能，而且電腦仲識得自動計算所在地與目的地的距離、可行路徑、所需時間等，啱晒自駕遊人士。最重要是新App支援離線下載地圖，用家可以預先免費下載全球104個國家的地圖，用嘅時候就唔使慢慢單撈，方便！

追加實用線上地圖

而Nokia亦同時推出《Nokia地圖》以及《Nokia公共運輸》兩個Apps，前者提供全球190多個國家、地區的地圖資訊，兼且將交通工具、餐廳、商店等熱點資訊整合；而後者則只需輸入目的地，手機就會自動提供不同的前往方法，服務範圍仲覆蓋超過45個國家及500個城市，功能相當實用。可惜此兩Apps都唔支援離線使用，稍嫌不便。

Choice 3：Motorola DEFY+ 升級三防

去旅行難免會上山下海，唔想部靚靚手機撞花刮損的話，三防手機就大派用場。單睇外形，Motorola DEFY+支援抗水、防塵，加上3.7吋屏幕採用耐刮的Corning Gorilla強化玻璃製作，就算咁唔好彩遇着橫風橫雨或沙塵暴都可以照樣傾電話，勁硬淨！雖然外形同上一代DEFY相差冇幾，不過新機就將處理器升級至時脈1GHz，喺Android 2.3系統下操作相當流暢，白色機身同桃紅按鍵仲好搶眼添！

Choice 4：SpareOne備用15年

Smartphone隨時玩唔夠一日就冇電，就算你唔打機、上網，都總要有部機傍身作緊急之用。驟眼睇SpareOne似足一部家居無線電話，實情佢係一部手機；最誇張係只需要用1粒AA電池就可以連續通話10小時，待機時間更長達15年，夠晒長氣！SpareOne機身設計簡約，只得Number Pad以及幾個功能鍵，想知道接收及電量狀況就要靠機面的兩盞細小的藍綠紅LED燈；而用家每作一個操作指令，手機都會發出不同的提示音，如鎖機會「嘟」一聲、着機時就「叮」三聲等等，不難應用。另外，新機亦備有多項緊急功能，包括冇SIM卡情況下長按十字緊急鍵就可以撥出預設的緊急電話，又有LED燈當電筒用，買來旅行、郊遊傍身就Very Good！

外遊貼心小配件

出門旅行仲有唔少瑣碎Gadgets一定要帶，好似一插即用嘅迷你Router、外置充電器等等，有埋佢哋就萬事俱備喇！

Edimax BR-6258n　即插迷你Router

有冇試過去到酒店先發現只提供Lan線而冇Wi-Fi呢？呢個只有火柴盒咁上下大嘅Edimax BR-6258n迷你Router，只要將上網LAN線插進這產品，就會即時Setup Wi-Fi無線網絡，簡單易用，啱晒各位iPhone、The New iPad用家！

Capdase Power Cruizer Battery Pack　iPhone叉6次

帶得咁多Gadgets出門就預咗要帶多幾個充電器，唔想咁煩，就不妨選擇Capdase的Power Cruizer Battery Pack外置充電器。呢個產品內置18,000mAh特大電池，透過轉插就可以為Notebook、平板等產品充電；就以iPhone為例，便可以充足6次，短Trip相信都夠用！

Capdase Weatherproof Case-Pebbo　iPhone超保護

這款Capdase出品的Weatherproof Case-Pebbo係專為iPhone 4/4S而設，機殼以堅硬物料製造，機側更設有開關鎖，加上度身訂造的塑膠內層，令到手機可以防雨、防塵兼防污。最方便是用上機殼後都依舊可以篤芒、開關手機以及調校音量，絕不影響操作。

SPEC

制式：SIM 1及SIM 2—UMTS 900/2100、GSM四頻

作業系統：Android 2.3.6

處理器：832GHz

記憶體：512MB ROM/384MB RAM、支援最高32GB microSD記憶卡

屏幕：3.14吋TFT（240×320解像度）

鏡頭：300萬像素

對外連接：HSDPA 7.2Mbps、Wi-Fi N、藍芽3.0、microUSB

體積：109.8×60.6×12.18mm

重量：111g

查詢：（a）3698 4698　（b）2136 6338　（c）2506 3888　（d）2959 6226　（e）3628 7550