貓貓狗狗喜雙飛

Hello！開心又一日，唔開心又一日，係人都想快快樂樂冇閉翳！《World Snap》今日第一次同大家見面，我哋致力Share地球上嘅抵死過癮事嚟博你一笑，等你個人開心啲，做咩嘢都醒神啲！以後個個星期二就約定你，等你畀Like！

狗：「汪！呢排主人好似成日講『雙飛』，你覺唔覺呢貓兄？」

貓：「喵！係呀，其實我哋都曉啦，所以我已經搵晒班貓朋狗友嚟Show Off喇！你睇係咪飛得好型先？」

狗：「掂噃！呀！最近主人又興講咩咩膽汁喎，我哋又使唔使……」

Dick Lau Reporter

玩到甩褲

西班牙加泰羅尼亞地區每年都會舉行別開生面叫Castell嘅「疊羅漢」比賽，人疊人，疊到十幾層，2010年時更成為聯合國教科文組織嘅「人類口述及無形遺產的傑作」添！玩呢個活動，膽量固然重要，但綁緊褲頭似乎更為重要，否則就好似相中呢位小姐咁裙拉褲甩，唔上唔落咁就爆喇！

Joshua Reporter

北海道呢檔嘢，究竟係買人頭定係買菜o架？唔講唔知，原來呢度興將種嗰棵菜嘅農夫玉照擺出嚟，作為食物質素嘅保證。萬一棵菜真係又老又唔好食的話，咁就名正言順「冤有『頭』，『菜』有主」喇！

Chiu Reporter

呢個年代嘅細路仔都鍾意碌地沙o架！不過有自選附加動作囉。好次喺芬蘭赫爾辛基市郊的伴侶島舉行嘅仲夏節慶祝活動上，就有兩小無猜情不自禁玩錫錫，仲愈錫愈肉緊，碌埋落地都癡情永不分，喺眾多人面前錫足十幾秒！最後畀在場工作人員強行拉開先肯「收口」。人仔細細就咁激，再大啲你話點算？

Kay Reporter

去馬爾代夫享受陽光與海灘嘅遊客，全身衣服布料總面積恐怕唔過一呎。其實，馬爾代夫係回教國家，好似相中呢位當地女士嚴守宗教清規，黑衣一襲，全身外露的皮膚總面積亦恐怕唔過一呎。不過佢位公子就相映成趣！着得Sharp醒又識Chok，唱埋歌的話，亞太區乜乜物物歌手個位都有得爭。

Seine Reporter