周身法寶HT 89 Batmobile
一個夜闌人靜嘅晚上，求救燈劃破長空，我知道又係時候出動喇，點知部《Batman：The Dark Knight》嘅Batmobile拎咗去大修，點算好？好彩Hot Toys啱啱幫我整咗架「89 Ver.」嘅Batmobile頂住先，無論外形、比例、軚環及武器都跟到十足；望住儀錶板、踩油門，我就從玩具櫃一躍而出，令一眾Figure迷羨慕到痹！
以上嘅玩具狂想曲，相信每個Batman粉絲都發過，皆因有型好打又有錢之餘，Batman另一顛倒眾生嘅賣點，就係每一代都有靚車代步，數到最經典，1989年《Batman》嘅子彈形Batmobile，分分鐘比《The Dark Knight》嘅裝甲車版本更得民心，HT老闆Howard亦有同感：「如果Christopher Nolan嘅蝙蝠俠係寫實派，Tim Burton就係幻想派，後者嘅Batmobile好似從漫畫跳出嚟；其實好多年前我已經想做佢出嚟，但以前嘅技術及成本都未到位，先至擱置。但之後吸取咗《The Dark Knight》嘅Batman經驗，我哋終於掌握到做巨型車款嘅心得，攞到89年嘅《Batman》版權後，就立刻展開籌備工作。」
流線車殼 一體成形
89 Batmobile嘅籌備工作，早喺去年一月開始，歷時咁耐，皆因變身1/6後，車展長、闊、高都分別多達39吋、16吋及9吋，車殼又用咗極花工夫嘅一體成形技術，只能慢工出細貨，好彩由ABS膠料打造嘅車身神似度極高，無論係流線嘅外側車體、蝙蝠形嘅尾翼，以至霸氣十足嘅車頭渦輪式入風口都跟足實物。而且四個車輪都可以獨立轉向，每個又包埋橡膠輪胎，連輪圈中間嘅蝙蝠Logo都做到足，而且跟《The Dark Knight》嘅蝙蝠車一樣，89 Batmobile嘅頭尾都有着燈裝置，同全黑色嘅車身形成強烈對比。
周身法寶 出鈎又出槍
如果你去年去過動漫節嘅話，應該記得89 Batmobile已經現身，不過當時車廂仲未成形；今日現身嘅新試辦就好唔同，唔只儀錶板、軚環、波檔及座椅重見天日，車廂空間亦大咗唔少，只要打開車頂，就可以放埋同系嘅Batman入去，做到人車合一。
另一方面，無論任何年代嘅Batmobile，都同占士邦嘅座駕一樣周身法寶，呢部89 Batmobile都唔例外，翻開頭冚兩側嘅活門，就可以升起一對M2機關槍；推開沙板，就可以伸出Batdiscs、三爪鈎及機翼等特殊武器，真正做到逢車車，再者電影中可以伸出保護罩冚住車頂，HT嘅1/6版本就將呢部分製成獨立組件，可以成個套上去，裝嵌話咁易。售價方面，$4,280堪稱天價，好彩離派貨日仲有成年，落訂之後，仲有時間畀粉絲儲埋條尾數。
INFO
HT MMS 170 《Batman》 1/6 Batmobile（1989 Version）
零售價︰$4,280 預售價︰$4,200（Batman另購）
推出日期︰明年第二季
查詢︰2388 4677（Toy Hunters）
圖中為試辦款式，與正式推出的版本或有若干分別。
流線型嘅 89 Batmobile，忠實重現於HT嘅1/6傑作身上。
無論正常Look（左）或者加埋保護罩（右），HT都做到足。
翻開頭冚活門，就可以升起機關槍，同占士邦嘅Aston Martin比，邊部勁啲呢？
車頂設有滑軌，輕輕一拉就可以打開。
軚環、轉數錶、油壓計全部係立體雕製，唔係求其整張水貼了事。
車身兩側內藏Batdisc及三爪鈎等機關，冇偷懶。