原宿Toy Sapiens博物館規格
東京係港人嘅旅遊熱點，尤其是玩具迷，不惜山長水遠去掃特別版及懷舊玩具，從今以後，除咗去秋葉原，仲要逛埋原宿喇，事關HT首間日本旗艦店Toy Sapiens，已經喺當地開業。新店佔地超過1,600平方呎，分兩層，裝修到成間Hi-end玩具博物館咁款，唔似香港啲連鎖玩具店，將啲貨放齊放滿就算，仲要間間倒模一樣咁鬼悶，逛邊間都冇分別。
專業店員言之有物
話明係HT嘅日本旗艦店，主打梗係自家1/6 Figure，統統安放喺樓下店中央嘅「皇帝位」，每個都有獨立透明展櫃連射燈，前後左右都包你睇得清清楚楚。除此之外，新店仲有大量其他品牌嘅歐日玩具進駐，而且新貨與懷舊名作兼備，最開心係整整齊齊、清清楚楚咁放喺四周嘅玻璃櫃內，成個玩具大觀園。
香港嘅大集團玩具專銷店只有唯一功能—Sell貨，除咗答你仲有冇貨及賣幾錢外，其他資料通常答唔出。好彩HT嘅一班高層本身都係玩具迷，唔只賣玩具，所以好明白玩具迷入舖頭唔只想掃貨，仲想知道具體資訊，所以Toy Sapiens提供一對一嘅客戶服務，所有店員仲會接受與玩具有關嘅專業訓練，確保招呼玩具迷時有問有答、言之有物。順帶一提，位於原宿嘅Toy Sapiens，附近就係Bathing Ape、Beams、United Arrows及Diesel等潮牌名店，打算一遊嘅話，小心Budget隨時超標。
Shop Info
Toy Sapiens
地 址： G Bldg, 1/F., Jingumae 3-30-12, Shibuya-Ku, Tokyo 150-0001, Japan
營業時間： 早上11時至晚上7時（新年假期除外）
新店位於潮人地帶嘅原宿區，好易搵。
店內中央主打HT的1/6 Figure，每件都有獨立展櫃，夠Grand！
唔只有HT嘅重要人物Howard（右）及JC Hong（左），就連日本情景王山田卓司都出席開幕禮。
開幕當日有靚靚Show Girl駐場贈興，如果日日都有嘅話，我肯定每季都會飛去朝聖。
店內展出唔少Figure情景作品，入內就算唔幫襯，都包你大開眼界。
除咗HT出品，店內仲有大量歐日玩具出售，而且新貨與懷舊貨兼備。
睇見四周嘅精心布置，似博物館多過玩具店。