出手助人HT Spider-Man in Black Suit

多得《Spider-Man》唔少，整句「能力愈大，責任愈大」嘅入晒腦對白，仲成為唔少Boss對下屬嘅訓示台詞，唉，又唔見人工成比例變大……講番正題，Hot Toys最新1/6作品就係Spider-Man，仲係好少Figure化嘅《Spider-Man 3》黑蜘蛛，隨盒送埋巨型沙人地台，毒性甚高，仲可以加錢換購手部Parts；咪柴台話HT搶錢住，事關額外收益會全數撥捐聯合國兒童基金會（UNICEF），咁又唔同係咪？

HT做善事唔係第一次，以前就出過限量慈善版家駒Figure，今次夥拍UNICEF，非會員顧客想訂購會員限量版產品，只需捐出一定金額，HT就會送出該款產品嘅限量版配件，所得善款將全數撥捐UNICEF，黑蜘蛛正係第一個籌款Project。

點只換衫咁簡單

善事歸善事，想玩家甘心「科水」，產品質素始終係最重要。自HT啟動Spider-Man系列後，蜘蛛俠、綠魔都冇令大家失望，至於今次黑蜘蛛，驟眼睇，換咗件黑色貼身蜘蛛衫，好慳水慳力啫！不過官方話做咗好多大改動，首先心口及背脊嘅蜘蛛Logo係全新設計，唔只跟足電影戲服，而且比舊Logo大咗啲。另外，以往嘅蜂巢狀網紋只係燙印上去，今次改用新物料及新壓印技術，摸上手更有質感。最後，上次有打底衫避免關節穿崩，今次都唔例外，仲有托底作用，着咗會令面衫增添反光效果，再度追貼電影嘅形象。

新增Peter Paker頭雕

全新蜘蛛俠電影《The Amazing Spider-Man》明年上映，男主角換上新人Andrew Garfield，可能先入為主，筆者始終覺得《Spider-Man》三部曲嘅Tobey Maguire更加維肖維妙。今次HT就還大家心願，附送Peter Paker真人頭雕一個，由韓籍新進雕頭師K.A.Kim操刀，據官方指出只係修改咗一次，電影公司就Pass。不過就初辦實物所見，雕工似乎跟Yulli等大師仲有啲距離，例如鼻頭太寬、面形過長，表情又過於木口木面，帶唔出黑蜘蛛嘅邪氣。不過有彈亦有讚，今次以換件形式換頭，抬頭時避免頭笠下巴位爆線，可以放心玩。

流星錘做慈善Parts

玩得蜘蛛俠，梗係想玩埋噴絲絕技，以往好多Figure廠都忽視呢個提供，黑蜘蛛就畀足誠意，提供多條蜘蛛絲配件，只要插喺手腕位嘅暗格，就模擬到噴絲效果。此外，《Spider-Man 3》蜘蛛俠同沙人由頭打到尾，為咗令玩家可以重演呢幕，跟盒送埋巨型沙人地台一個，由搪膠製造，表情同質感都跟到十足；至於限量流星錘換手Parts，就係專為籌款而設，預訂時畀多$100，派貨時就會隨盒送上，平平哋玩多件Parts，又可以做善事，何樂而不為！

HT 《Spider-Man 3》 1/6 Spider-Man Black Suit Version

with Sandman Diorama Base

零售價︰$1,430

預訂價︰$1,380

推出日期︰2012年第2季

查詢︰2388 4677（Toy Hunters）