輪胎保養減意外

輪胎狀況好壞，往往係行車安全關鍵所在，事關若然「日久失修」，導致胎紋深度不足，影響排水力之餘，與地面嘅摩擦力仲會大打折扣，從而失去抓地力，起步時打滑、急煞時失控，十分危險！所以無論你係私家車車主，又或者職業司機，都要時刻關注輪胎嘅保養問題，今次就搵嚟經驗十足嘅Audi Centre作專業解畫，以後唔使靠估啦！

輪胎似足我哋對鞋，就如鞋底磨平晒、冇晒坑，就算個地冇水漬，跑快步都隨時跣低；做人跣低可以企番起身，部車跣低分分鐘人命關天，不可掉以輕心。輪胎跣唔跣，首先要睇坑紋，Audi Centre嘅維修部副技術主任Jacky Man就話：「正常嘅輪胎坑紋要有6至7mm深，主要功能係排水，同埋增加與地面嘅摩擦力，藉此維持與地面嘅抓地效果，高速及煞停都可以聽聽話話。胎紋唔夠深度的話，除咗影響安全，仲會增加路噪，因為輪胎嚴重磨蝕後，隔音效能都會隨之減低，與地面摩擦嘅聲音就會直接傳入車內。」

駕駛習慣影響大

既然胎紋深淺咁重要，又有咩因素會加速磨蝕？首先，如果閣下經常行駛崎嶇路面，包括路上布滿碎石，甚至係泥路等，自然蝕得分外快；除此之外，Jacky話不良嘅駕駛習慣都有好大影響：「經常大油起步，會令輪胎嘅摩擦壓力大增，仲有經常高速攻彎，都會加快輪胎磨蝕。至於意外撞擊或畀刺中等小意外，或者經常軚氣不足，都會縮短輪胎壽命。所以要定期檢查輪胎狀況，防患於未然，發現輪胎有怪聲，或胎紋少於1mm，又或者起步打滑，就要盡快送部車去檢查，Check真啲係唔係到時候要換胎喇！」

日常檢查小貼士

• 肉眼檢視輪胎表面有冇嚴重磨蝕，包括胎紋深度會否少於1mm、胎壁表面有冇明顯損毀，有嘅話，梗係要拿拿聲換胎啦！

• 檢查氣壓，唔好過多或過少；想知部車用幾多胎壓？通常司機位近門邊位置都有廠方指示，好易睇。

• 後備輪胎都要確保胎紋正常、氣壓充足，最好擺定支補胎液喺尾箱，必要時就可大派用場！

解碼基本法

除咗基本檢查，仲要知清楚所用嘅輪胎尺寸是否合適，因為太大嘅話會嘥油，太細嘅話與地面接觸點不足，影響車速之餘，最大問題係減弱制動效果。想知條胎啱唔啱Size，有關代碼就要知清楚，以較常見嘅205/60R15 94H為例，就有以下多項資訊解讀：

205 — 輪胎表面寬度，以mm為單位，205即係205mm；

60 — 輪胎嘅扁平率，係輪胎寬度與高度嘅比例；

R — 胎紋結構，常見有R、B及D等，分別代表「輻射層」、「環帶交叉層」及「交叉層」，因應唔同車重有唔同配搭，車主手冊一定會講明用邊款，為安全計，記住跟足咪搞錯；

15 — 輪胎直徑，以吋為單位，呢個例子即係15吋咁解；

94 — 負重指數，94即係94磅；

H — 輪胎承受嘅速度上限，較常見嘅有H、V及W等，分別代表210km/h、240km/h及270km/h等多種，都係跟足車主手冊最穩陣啦！

查詢：2262 1300、2553 8862（Audi Centre）