兄弟機Genoace 扭腰一流
Bandai最近一口氣推出兩款Gundam AGE嘅HG版聯邦軍量產機Genoace，矚目度比主角機AGE-1 Normal更高，原因除咗貫徹「Fun to build」嘅易砌風格外，全面罩頭部造型更顯真實感，加埋超好扭又紮實嘅腰部設計，攞上手仲以為玩緊價錢貴一截嘅Robot魂。
話說日本有傳媒做咗個調查，發現《Gundam AGE》收視屢創新低，第3集嘅收視率仲要差過當年嘅《Gundam X》；反觀差唔多同步播映嘅香港就未見此慘況，似乎本地高達迷相當受落，可能同Bandai密集式玩具攻勢有關吧！
造型組裝簡潔利落
講番Genoace，佢屬於地球聯邦軍嘅多用途量產機，可以對應重力下及宇宙環境，定位等如UC年代嘅吉姆，即係好打極有限啦！HG模型就跟足TV版設計，桃紅色嘅機身、透明藍嘅面罩，以及光速噴槍連電熱棍都有齊。基本上兩款Genoace都走簡約嘅機械設計路線，正因顏色唔多，所以分件上都算齊色，只需噴消光已經有唔錯效果，加上水口切位偏薄，部分仲隱藏喺模件內，剪件後略為打磨已經成事，而且完成品質素直逼Robot魂。
可動性下半身贏晒
白色機Genoace Custom有「白狼」嘅稱號，係聯邦軍王牌機師沃爾夫嘅專用機，除咗機身顏色，以及頭部、肩甲、背部及武器有所分別外，機身主體與關節位都同「雜魚」Genoace相同。講到關節，呢兩款機體嘅腰位設計都好抵讚，用咗前後Ball Joint組合，上半身與腰部之間嘅連接位就預留滑動空間，令上半身可作大幅度前後左右扭動。此外，膝蓋有雙關節之餘，腳眼又有套入式關節，增加接地能力；可惜手肘只有單關節，肩甲又冇拉出式關節，雖然前腕有小關節，不過屈曲幅度唔大，令Genoace嘅可動性變得「上輕下重」，日後升呢推出MG嘅話，希望會作出改善啦！
HG Gundam AGE RGE-B790 Genoace（左）及RGE-B790CW Genoace Custom （右） 建議零售價：$139/個
腰部前後用Ball Joint緊扣，連接上半身又預留咗滑動空間，好扭！
Genoace Custom護目罩可透視出雙眼構造，Genoace就只有單眼，擺明係卒仔機。
兩者嘅背包經已反映出機動性嘅高低，白狼有雙推進器，梗係好力啲。
Genoace Custom附有光速噴槍ⅢB，軍刀可獨立拆落嚟用，隨盒再跟練習用噴槍。
Genoace嘅光速噴槍槍身較短，槍頭下方附有瞄準器。
手肘只有單關節，猶幸前腕有少少向上拗嘅空間。
膝蓋有雙關節，令小腿可以向後超過90°屈曲，可惜腳掌無法往後拗。
Genoace Custom嘅格鬥能力較高，皆因多咗把軍刀。
拔走電熱棍嘅棍身，就可以喺棍柄加上劍身，變成激光劍。