Reporter's Choice

布甸專門店

我喜歡食布甸，到日本旅行，每日至少食一個，愛其奶味香濃，入口嫩滑無比，而每日最煩惱的就是決定吃哪一款口味。香港超市售賣的布甸種類很少，可幸跑馬地有間主打布甸的甜品店和櫻屋，口味眾多，紅豆、抹茶、朱古力、柚子都有，今次我買了期間限定的鹿兒島紫番薯布甸，紫番薯味道濃郁，加上面頭的黃番薯粒，勁好味，下次我要食栗子味！

微笑曲奇

從前問人：九龍城有咩好食？大家都會答泰國菜，但現在答案都變成「甜品」，皆因區內的甜品店愈開愈多，更不乏知名之選，其中一間是曲奇四重奏。其雜錦曲奇，一打開蓋即令人會心微笑，因為正中間是4塊笑臉曲奇。而整盒曲奇共9款口味，包括綠茶、朱古力、牛油等，款款都很鬆脆，而我最喜歡的就是咖啡口味，入口咖啡味及牛油味各不相讓，但又不會過膩。聽說店子的蝴蝶酥亦很有名，牛油味重而香脆，講起都想食。

再見老牌糖水店

除了和式及西式甜品外，中式傳統甜品亦深得我心，或許女生真的特別愛吃甜品吧！早前得知銅鑼灣的傳統糖水舖「一品齋」即將結業，於是把握機會食多幾次。這間小店位於銅鑼灣一小巷內，我由學生時代已經幫襯，一來味道好，二來價錢便宜，十幾蚊就有一碗足料糖水，好抵食。今次吃了腐竹銀杏糖水，舀一下，有滿滿的銀杏和薏米，味道甘香；糖水則帶濃濃腐竹香，甜而不膩，曾目睹這裏的員工人手為銀杏去衣，絕對是心機之作，但願店子早日覓得適合地方重開。