美式大鐵牛 HT 1/6 Iron Monger

近年超合金魂大熱，三一萬能俠、巨靈神、宇宙大帝等全部入晒屋，款款都超精細、勁熱血，滿足晒一眾Robot迷嘅童年夢想。相反Figure迷長年累月玩着衫公仔，雖然話愈出愈靚，但講真玩得多都悶，所以當各位見到Hot Toys最新作品Iron Monger之時，真的眼前一亮！事關17.5吋超高身形已經夠晒嚇鬼，重裝機甲背後仲有半截人形素體，機械加人偶，一次過滿足兩個願望。

Iron Man由Mark I 出到Mark VI，加埋動漫節特別版及各式Battle Damanged，大大話話出過十幾款，再出唔只悶親粉絲，仲辛苦埋一班幕後製作人；好彩HT會定期製作一班配角，之前已經有Whiplash、Black Widow及War Machine，依家輪到第一集嘅大奸角Iron Monger，HT咁解畫︰「其實早喺Mark I 時，我哋已經將Iron Monger排入開發時間表內，奈何之後嘅新Project太多，為咗唔影響質素，惟有推遲製作。」HT仲補充，雖然Iron Monger泥塑早喺去年嘅東京十周年展曝光，但為求精益求精，於是用多半年時間塗裝及改良，精細程度比超合金魂猶有過之。

60組關節超靈活

HT並非第一次製作巨型機械人，《Aliens》時就出過Power Loader，但論構造及內藏機關，今次Iron Monger就複雜得多。首先整套裝甲由頭到腳都係重新起模，並按1:6比例做到有17.5吋高，幾乎比同比例嘅Iron Man高出半個身位，相信一般Figure櫃都未必擺得落。體積放大、細緻度更加交足貨，前胸機艙、四肢嘅油壓裝置、腳掌噴射器、雙手武器包括火神炮、火箭炮統統100%跟足原著，連帶八隻手指都能夠靈活郁動，埋單計算全身關節超過60個，莫講話創咗1/6 Figure紀錄，好多山口式玩具都唔夠佢多。當然Iron Man系列必備嘅亮燈裝置，Iron Monger一樣有，裝咗喺雙眼、雙掌及心口，火神炮旁邊嘅瞄準器都識發光，認真到O晒嘴。

素體四肢慘被切除

電影中Iron Monger由Iron Man Mark I 改裝而成，大壞蛋Obadiah Stane喺內部植入駕駛艙，直頭當佢係天威勇士或者高狄安咁揸。為咗重現呢個Gimmick，Figure同樣內置駕駛艙，只要打開胸前機關，就見到12吋Obadiah人偶，不過為咗顧及可動性，人偶只有頭雕及上半身，四肢慘被「切除」，好彩頭雕係獨立分件，玩家可以另找Body及西裝還其「真身」。講到頭雕，HT坦言難度唔算高，事關演員Jeff Bridges嘅頭雕早於《Tron》時已經做過，如今Kojun只需換上光頭，並且加深魚尾紋、火車軌及青筋等Detail位，令面相老多幾錢重就搞掂。

查詢︰2388 4677（玩具狂熱）