ChatRoom

家庭版 記者Jackie

仍未逛書展，這本小克的《偽科學鑑證5之佛光初現》非書展戰利品，多得愛逛書店的同事Ivy相告，於展前兩周已成功入手。雖知道不再是少艾，要令人動容、被引致笑到標眼水，兼差點失禁的極端心花放Moment，近半年好像未曾發生過，直至獲書那晚，就一個人靜靜地在家欣賞他繼續畫聾貓、玩食字、改歌詞、論維港、轉筆鋒嚴肅談生老病死。很是享受的一晚，睇書睇到嘈之巴閉，實屬首次。

家庭版 記者Denise

家有兩貓，今年同是7歲，女兒一出生便有這兩個哥哥，好福氣。哥哥們也很盡責，女兒午睡，牠們會默契地一左一右睡在其身旁，每當有人走近，波波就會警覺地瞄一瞄，肯定安全後再沉沉睡去。這一人兩貓的午睡時光，總讓我很窩心，誰敢再說貓與小孩不能共存呢？事實上，現在兩頭大貓完全臣服於女兒，曾親眼目睹她指揮波波去飲水，又見過西瓜乖乖待在其身邊一起「玩」煮飯仔，這都是我養貓多年從未見過的事情，只能說：好爆！

家庭版 記者Rachel

堅持係咪無謂，在乎你點睇。

某日無意看到楊協成巴士燈箱廣告，忽然起了買楊協成清涼爽飲的念頭，誰知行勻七仔、OK都冇，失望唔係因為冇得飲，而是發現他們的市場佔有率竟然咁低，放棄定堅持？我揀後者，最終竟然在Market Place飲品架最上層找得到，仲放咗响「好朋友」王老吉側邊，看到也有點心，不過，當5蚊都買不到一盒285ml維他檸檬茶時、想想台式奶茶加珍珠都要加3蚊嘅時候，拎住呢罐$4.2半暖不凍的楊協成清涼爽，反而覺得透心涼，仲要加涼粉唔使錢添！

所以，有時堅持……其實都幾爽！