扮靚美容Apps話咁易變索女

所謂「女為悅己者容」，然而夏天一到，皮膚就好難打理，加上小背心、Bikini出籠，手臂有Bye Bye肉同鬆弛紋就認真醜怪。唔想咁樣又冇時間去做Treatment﹖不妨「單撈」定以下呢幾款扮靚美容Apps，由美肌、瘦身、化妝，到煲滋陰湯水都可以自己一手搞掂，咁就可以日日都Keep住靚！

美肌大測試《CB美利天下》

香港OL經常捱更抵夜，搞到皮膚問題叢生，若想對症下藥，呢款App就幫到你。它提供了一系列選擇題，女生只要跟住回答，就能了解自己的肌膚狀況，以及最適合的美肌方法。若嫌問答題未夠全面，它更提供「拍照分析」功能，自拍後Send張相畀醫學美容中心，他們便會有專人提供協助。此App還能根據氣溫及濕度等資料，向用家推介每日的美肌小貼士，出門前記得望一望呀！

費用︰免費

由頭靚到腳 《美女速成班》

小記成日都話美容院好好賺，因為女士唔單止愛肌如命，其他身體部位都同樣注重。《美女速成班》就將女士美容，細分為美髮、減肥、護膚、美胸、防皺、抗痘、美白及塑身等18大類，令你由頭靚到落腳，而且每個類別都有詳細說明，單是相片便有超過400張，內容相當豐富！另外，它還會教授香水及高踭鞋的選購及保養方法，如此全面，男士們記得幫女友「單撈」了！

費用︰免費

扮靚Mini Game 《Sally's Spa》

化妝美容其實好花時間，但若把它們變成遊戲，保證大家會玩到不知時日過。《Sally's Spa》是一款有趣的模擬遊戲，玩家要協助店主Sally，照顧客人們的不同需要，例如焗桑拿、敷Mask、美甲及按摩等，全部篤芒便能完成，看似簡單，但客人一多時就會玩到手忙腳亂，相當刺激！遊戲的2D卡通畫面不算出色，但配樂卻相當輕鬆舒適，猶如進入了Spa一樣，做Facial無聊時不妨用來打發時間。

費用︰US$2.99

化妝做GaGa《Celebrity Makeup Looks》

《Celebrity Makeup Looks》請來多位外國有名的Video Blogger，教授大家各大明星的化妝方法，當中包括Britney Spears、Beyonce、Angelina Jolie及樂壇癲后Lady GaGa等，跟住學隨時化身做巨星。惟留意所有短片都是實時串流，播放時未必暢順。

費用︰免費

煲滋補靚湯《日行一膳－美容湯水31天》

俗語有云「女人唔補好易老」，很多肌膚問題，其實都與體質有關，因此適時進補，就能從內到外改善問題。此App提供了一整個月的湯水食譜，並附有完整材料及做法，女士們「照辦煮湯」飲用就能達到養生之效。而針對職業女性因壓力而導致內分泌失調，它還會建議一些自然湯水，幫助她們美白、祛斑、去黑眼圈及補肺益腎。惟食療成效始終因人而異，如有疑問，記得請教註冊中醫師呀！

費用︰US$1.99