Motorola EX223雙卡雙入力

小記有位內地朋友成日話當地網絡收得唔好，所以買親手機都必揀雙卡款式，因為就算一個網絡收唔到，都立刻有另一個補上。由此可見，雙卡手機在內地有幾大市場，遂吸引到好多大廠推出對應產品。最近Motorola就有部EX223，行雙SIM兼提供篤芒及QWERTY兩種輸入方式（日語：入力），仲要只賣一千蚊多啲，勁抵玩！

Motorola多年來都有Keep住出雙卡手機，去年底就出過一部EX115，珍珠白機身配埋QWERTY鍵盤，外形激似黑莓機，甚受OL歡迎。今次EX223設計相若，但就追加觸控式屏幕，提供多一個輸入方式，多一重便利。

黑白機身夠醒目

EX223基本上由2.4吋屏幕及QWERTY鍵盤兩部分組成，兩者面積一樣，並採用黑撞白設計，外觀既工整又醒目。在僅厚9.9mm嘅機身裏，藏有兩組SIM卡槽，並支援雙卡雙待，即使致電任何一張SIM卡號碼，亦能隨時接通電話。用戶也可選定以某一張SIM卡來撥號、發送SMS或電郵，又或者把其中一張暫時關掉以節省電源，整個過程毋須熄機換卡，相當方便。較可惜的是它僅對應GSM四頻，插入3G卡時會自動降回2G網絡，另外其機身不設切換鍵，因此切換主SIM卡都要透過Menu進行，這一設計就不及Samsung Champ DUOS等對手細心了。

支援手寫香港字

至於操作方式，一般雙卡機特別係山寨出品，都只配備了傳統數字Keypad，但EX223卻罕有地提供完整QWERTY鍵盤，打字更加方便。實測所見，字粒面積尚算適中，即使手指頭較大也能操作自如，唯一問題係回彈力稍遜，感覺唔夠實在。好彩嘅係佢還設有一個觸控屏幕，而且採用了平價機中少見嘅電容式背板，無論轉頁或打字都相當爽快。另外，除了拼音、注音及筆畫等中文輸入法外，它還支援中文手寫，不但認到簡體中文，就連「鰂」、「邨」等香港字都成功辨認得到，發送SMS自然更加傳神！

內置社交網捷徑

內涵方面，雖然EX223並非Smartphone，但廠商在介面上也花過心思，例如所有圖示及文字都刻意放大，令細芒都睇得舒適；另外，主頁被劃分為「基本功能」、「多媒體」、「通訊」、「互聯網」及「應用」等五個主題，只要用手指一撥就能切換，簡單又清晰。另外，針對社交方面的需要，此機還內建了Facebook、MySpace、Twitter及Yahoo! Messenger等社交網捷徑，至啱Social精使用。特別一提，有見此機最多只能支援較慢的EDGE制式上網，故此廠商特別加入Opera Mobile瀏覽器，開網頁前會預先壓縮內容，存取時間縮短啲，上網唔覺得比3.5G手機慢太多！

SPEC

制式︰GSM四頻

屏幕︰2.4吋26萬色TFT 240×320解像度

鏡頭︰300萬像素

記憶體︰支援microSD（最高32GB）

對外連接︰藍芽、USB 2.0、EDGE

通話時間︰250分鐘

備用時間︰200小時

體積︰103×60×9.9mm

重量︰92g