《Thor：God of Thunder》錘打雷劈

改編自Marvel漫畫的《Thor：God of Thunder》電影剛剛上畫，同名的電視遊戲亦會於今日登場，遊戲內的動作表現都幾有水準，這位北歐神話中以閃電神力拯救世界的英雄，揮動鐵錘擊殺敵人的場面頗為震撼，還可一如電影般加入3D顯示，值得一玩！

原創故事有新鮮感

大家唔好以為遊戲只係翻抄電影劇情，事實上開發小組就專登為遊戲重新創作一個原創故事，所以即使睇了電影都好，玩起來都有唔同嘅感覺。《Thor》同樣以動作為主，感覺跟《God of War》類似，雖然血腥同暴力程度未及《God of War》，但遊戲在動作表現以及絕招數量上都交到貨。Thor的基本武器是手上的鐵錘，可以做出多種連續技外，亦可以將鐵錘拋出去攻擊，更能運用與生俱來的神力，控制閃電、行雷及強風等超能力打翻敵人，招式變化同光影表現都做得華麗流暢。

隻揪幾十呎高大佬

開發小組都明白到玩動作遊戲是想追求快感，尤其係可以打低幾層樓高的大佬就更加爽，所以今次每關出現的大佬，個個都幾十尺高、幾十噸重，唔打得都睇得，當然各位都要食腦諗吓計仔，兼運用唔同嘅必殺技先有機會過關，千祈唔好單靠一鋪蠻力。另外，遊戲設有升級系統，可以用賺取的Valor Points去升級武器及超能力，到時打大佬就容易得多。值得一提是遊戲內出現的大佬都跟足漫畫原著，如原本雷神眾多死敵Ulik、Ymir、Surtur等都會悉數登場，相信各位漫畫迷肯定會玩得好投入。

類型：動作

開發：Liquid Entertainment

平台：PS3、Xbox 360

發售：今日（4月29日）

售價：$328

查詢：2620 6667