食盡沙巴 大咬星級咖央包

別以為沙巴只得陽光海灘，其實街頭巷尾盡是隱世美食。今次沙巴美食之旅有食神Michael做盲公竹，每天睜開眼便到食店勁擦，食至衣衫濕透，回酒店過完冷河後又再擦過；付出無盡汗水，終於食到威震馬拉的咖央包以及滑過豆腐嘅客家魚蛋！

超鬆軟咖央包

沙巴人果然擦得，飯後十時多，仍可啃得落咖央多！專售咖央多及奶茶的富源，稱得上是沙巴最馳名的咖央多名店，日賣二、三千條方包，而且港星捧場客眾多，包括林家棟、曾志偉及劉青雲都歎過其出品。普通一塊方包，究竟是如何引得眾星垂青？麵包除焗製得如海綿般軟熟外，獨門咖央醬甜度適中，再夾一塊厚切牛油一併放入口，鬆軟無窮；喜歡香脆口感的話，可叫客傳統咖央多，不過多數食客較鍾情軟熟咖央包。咬啖包，再呷啖香滑拉茶，簡直是完美配搭。

Michael也覺得未烘的咖央包更好味，最高紀錄是鯨吞18件，還力讚富源的方包夠鬆軟，幾乎「See Through」咁滯。歎完多士奶茶，眾人圍住富源話事人楊先生，企圖解開方包鬆軟之謎。楊生的高招太極，耍得我們團團轉，佢話美味咖央包係唔小心做出來，突圍而出是因為命水！我相信除靠楊生口中的運氣與命水外，選料嚴謹及用料新鮮，都是富源成功之道。

富源茶餐室

地址： A3, G/F Phase 4 Damai Plaza, 88330,

Kota Kinabalu, Sabah

電話： （60） 16 801 9966

魚蛋滑如豆腐

專售客家魚蛋的喜嶺登茶室，軟如豆腐的客家魚蛋是鎮店之寶。茶室的經營方針非常專一，只賣腐皮魚卷及腸粉，唯一花招是在腐皮魚卷內加入皮蛋，每天營業至下午三時便打烊！巨如乒乓球的客家魚蛋，咬兩下已可滑落喉嚨，連吞多粒魚蛋的Michael，更邊食邊笑說80歲的公公婆婆都食得！老闆胡先生話，魚蛋炮製得嫩滑鮮味，沒有甚麼特別秘方，只要用的豆腐魚夠新鮮，去骨後不斷加鹽水搓打，握成球狀用文火煮一分鐘，撈起便最爽滑。聽落簡單，但相信每個細節，都蘊含多年的經驗。

喜嶺登茶室

地址： Lot13，Kolam Centre Phase 2, 88300,

Kota Kinabalu, Sabah

電話： （60） 16 830 6672

INFO

簽證： 持特區護照或BNO均免簽證

機票： 香港至沙巴經濟客位來回機票約HK$1,200

貨幣： RM1約兌HK$2.58

天氣： 4月份氣溫24℃ - 32℃

網址： sabahtourism.net