《Football Kicks》學碧咸拉西

自從萬人迷碧咸過咗去美職聯後,人氣大跌,不過佢嘅七旋斬罰球依然令唔少球迷懷念。想重溫碧咸當年嘅絕技,咁就一定要玩《Football Kicks》!玩家扮演罰球專家,要射中龍門內不同分數嘅標靶,位置極刁鑽,有時連腳趾尾拉西都要出埋,真係難玩過「勁力射球九宮格」呀!

儲分換波Boots

遊戲總共有3個模式,分別為時間計時賽「Beat The Clock」、射失即輸嘅「Sudden Death」以及有人牆阻擋嘅「Beat the Wall」。其中最難一定係「Beat the Wall」,因為要射穿人牆之餘,仲要射中標靶,但只得5次機會,稍一不慎就即時Game Over。最重要嘅係每玩完一局,都會因應你嘅得分派發Coins,儲夠一定數量嘅Conis,仲可以幫球員更換樣貌、髮型、波衫、波Boots等等,最搞鬼係連性別都可以換埋,女球迷一樣啱玩。

下載:免費

Vincent

射波前要睇清楚球員嘅重心腳,先決定點樣拉西。

除了3大模式外,連場館都可以換埋,令遊戲更加耐玩。

由頭至腳都可以靠儲Coins嚟個大變身,人人都可以自創獨特角色!

「Beat the Wall」都幾難玩,開頭一人人牆都幾易過,不過後來會陸續增加人數,拉西都唔一定過到。