運動迷必裝 iPhone體壇天書

全球運動聯賽正進行得如火如荼，歐聯打到16強、英超曼聯阿仙奴爭崩頭、NBA季後賽席位亦未知花落誰家，就連F1一級方式程亦即將舉行！奈何身處香港，好多賽事唔係深宵直播，就係一大清早舉行，叫人點追睇！好彩依家有iPhone幫手，只要裝齊相關Apps，就能掌握各地聯賽嘅即時賽果、新聞及動向，部分更可以睇埋網球同黃金田徑聯賽，返工前刨定，唔怕吹水冇話題！

講到全球最受歡迎嘅體育項目，一定非足球莫屬，App Store就有大量足球Apps下載，好似今次同大家推介歐聯同英超兩款，加埋本地製作《東方波經》，最新賽事資料盡掌握！除咗足球，籃球、賽車、網球同田徑一樣好多人追，與其上網慢慢摷料，不如裝齊以下嘅iPhone Apps，隨時隨地拎出嚟Update啦！

《UEFA.com mobile》

緊貼歐聯

歐聯同歐霸盃分別進入16強及32強賽事，大部分名牌球會都能躋身其中，好似兵工廠對巴塞，紅魔對馬賽，場場硬仗，個個球迷都睇到腎上腺素飆升！透過官方呢個UEFA.com mobile程式，就能睇到各球隊嘅備戰狀態、即時賽果、相片及精華短片。程式更備有響鬧功能，當愛隊開賽或入球時就會鬧醒用戶，約咗周公都知醒！

下載︰免費

《SingTel Barclays Premier League》

英超快訊

執筆之時，紅魔剛被車仔擊敗，賽後費格遜大發牢騷兼投訴球證，透過呢款英超官方App，小記就即時知道費Sir因此而被聯賽會罰款，消息比其他媒體更快一步！作為官方產物，程式資料相當齊全，由各隊球會新聞，到賽程、得分榜都落齊，若去到英國插番張SingTel電話卡，更可以睇埋現場直播，連波飛都慳番！

下載︰免費

《東方波經》

本地製作

大部分足球Apps都是以英文為主，睇落始終未夠親切，呢款《東方波經》就唔同，唔單止內容由on.cc波經頻道提供，還採用全中文介面，用落更親切，睇得更投入。足球資訊亦十分全面，有齊英超、西甲、意甲及德甲等超過20個國家嘅聯賽資料，球迷仲可以睇埋球賽賠率，方便睇波之餘，亦可以碰碰運氣。

下載︰免費

《NBA Game Time Lite》

籃迷天地

安東尼出走紐約、碧比加盟熱火、迪朗威廉士轉投網隊，NBA消息真係跟少一陣都唔得，好彩球迷有呢款官方Apps幫手，能知曉即時賽果、聯盟新聞及最新岸區排名。程式還會每天更新Twitter、圖片及球賽精華，假如申請了League Pass的話，更可以直擊比賽情況，到時仲使乜趕返屋企睇精華重播！

下載︰免費

《Formula Racing 2011》

直擊F1賽車

主辦世界一級方程式賽事嘅FIA幾乎每年改例，好似今年就突然轉用派拉利輪胎，搞到3月開始嘅賽事更難預測。《Formula Racing 2011》正是為各賽車迷而設，最大賣點係提供多個即時功能，例如旁述、排位、圈速及意外狀況等，資料比現場直播仲要全面。程式更有齊紅牛、麥拿侖等車隊嘅最新消息及歷史，猶如車壇百科一樣。

下載︰US$1.99

《Eurosport》

包羅萬有

小記讀書嗰陣最鍾意睇《體育世界》，事關用短短一個小時就能知道全球體壇資訊，夠晒即食！呢款《Eurosport》內容同樣廣泛，足球、籃球不在話下，就連較冷門嘅板球、網球、單車及田徑都涵蓋得到，可謂照顧到不同人士的喜好。但個人最Buy都係佢有埋簡體中文版，劉翔唔會變咗做「Liu Xiang」，夠親切！

下載︰免費