導演過料 iPhone拍片一樣掂
星爺講過，人人都係食神，同樣道理，只要有心，人人都可以係大導演。唔係咩？依家拎住部iPhone 4就拍到720p高清短片，拍完仲可以掟上網，等YouTube幫你免費發行！而有見大勢所趨，即將舉行嘅《第五屆亞洲電影大獎》，今年亦特別增設短片項目，鼓勵大家用手機拍片。然而如何用簡單器材拍出電影感呢？以下就請來專業大導教大家拍片心得，加埋各式軟硬補品，分分鐘媲美朴贊郁！
提到iPhone拍片，就不得不提曾執導《原罪犯》及《親切的金子》嘅韓國導演朴贊郁。早前佢跟胞弟用iPhone 4合拍了一套30分鐘嘅魔幻短片《Night Fishing》，結果於柏林影展奪得最高榮譽嘅金熊獎，令全球驚嘆。他更揚言iPhone拍戲熱潮會陸續於世界各地興起，所以依家唔學定先，將來實畀人話Out！
網址︰http://www.youtube.com/watch?v=s9YYlG5Syq8&feature=related
心得篇
朴大導就話有深厚嘅電影根底，一般手機用家又可以點跟呢？唔使愁，即請來《魔術男》導演黃修平教大家拍片心得，跟住學，即使用手機拍片都有一定質素！
黃修平
畢業於香港中文大學藝術系，2004年完成首部劇情長片《當碧咸遇上奧雲》，即獲邀成為第一屆《香港亞洲電影節》開幕電影，並奪得美國獨立精神獎；其後拍攝第二部劇情長片《魔術男》，更獲得香港電影金像獎最佳新進導演提名。
技巧一：多拍特寫
手機短片沒有一定的片長限制，由1分鐘至30分鐘均可，但要在短時間內引起觀眾注意，黃導謂多拍人物大特寫是一個方法，例如用正面Shot強化代入感，或用背面Shot增加神秘感。惟要留意手機的白平衡未必準確，移動鏡頭容易令人臉變色，故應盡量留在光源充足的環境下拍攝。
技巧二：慢動作Pan鏡
Pan鏡（又叫追蹤拍攝）是電影最常用的拍攝手法之一，原理是利用一個相對較慢的快門來捕捉主體移動，令背景變得模糊且具有速度感。然而，由於手機不能調校快門，因此Pan鏡時應盡量減慢速度，或拍攝移動速度較慢嘅主體，否則就會令影像過分扭曲。黃導建議大家初學時應以靜態畫面為主，慢慢才加入Pan鏡效果。
技巧三：注意平衡
手機重量太輕，除非係專登要做到手搖鏡效果，否則拍攝時很容易會令重心偏移，導致影片歪埋一邊。AppStore有大量水平儀程式下載，拍攝前可先藉此量度手機位置，待水平時才Roll機拍攝。另外亦可借助腳架等輔助器材，避免雙手過分晃動。
道具篇
雖然iPhone勁多Apps玩，但受機能所限，好多廠商都為其推出硬件補品，當中有唔少更是為拍片而設。
輕巧長炮
前排睇《勁歌》總選，阿嬌全場拎住部加咗長炮嘅iPhone 4係咁影，就知手機本身個5倍數碼變焦好唔夠用！呢款由山寨廠推出嘅iPhone專用長炮，本身已提供8倍光學變焦，有效距離達246米，安裝上機身後，就合共提供40倍Zoom，真係打雀都得。最正係全Set鏡連埋機殼、腳架仔都只賣$200，合乎低成本拍片要求。
軟件篇
雖然有輔助器材幫手，但一些效果或後期製作，始終要靠軟件先做得到。好在AppStore有大量拍片Apps，以下就為大家精選出3款較有特色嘅程式，等各位慢慢玩。
管理場次
《MovieCamera》
下載︰US$2.99
程式不但設有豐富嘅攝錄功能，例如︰像素調校、手動白平衡及曝光等，還能替不同場次加入名稱及拍攝次數，方便用戶有條不紊地把短片排列起來。而為幫助大家了解收音情況，程式還備有Audio Meter顯示音量強弱，這樣太細聲時就可立刻改善，細心！
專業錄像
《Camcorder Pro》
下載︰US$0.99
專為iPhone而設嘅專業攝錄軟件，提供罕見嘅手震提示器及重力指示器，前者能防止手震，令畫面保持穩定；後者則簡單地讓拍攝者的視點與地平線對齊，避免畫面左右不平衡。程式還內置偷拍模式，可神不知鬼不覺地進行拍攝，用嚟拍紀錄片就至啱！
移軸拍攝
《TiltShift Video》
下載︰US$1.99
以往iPhone只能在影相時玩到移軸鏡效果，但有咗《TiltShift Video》後，依家連拍片都用得！開始時，用戶要先選擇一段短片，載入後就能隨意在任何位置，加入不同程度嘅模糊效果。用戶更可調節埋飽和度、對比度、暗角及亮度，選項豐富。
拍片手機推介
iPhone 4拍片固然靚爆鏡，但其實坊間有好多手機都支援720p格式，部分甚至拍到1,080p全高清兼提供HDMI輸出，所以話用手機拍片，iPhone 4並非唯一選擇。
攝錄最強
DoCoMo SH-01C
全球已售手機中，拍攝規格暫時以SH-01C最強，不但鏡頭像素高達1,410萬，創下業界紀錄，更支援每秒30格的1,920×1,080全高清拍片，比720p更清更靚！若拍完後用其3.4吋AQUOS屏幕觀看，保證畫面利到(界)親手！
規格全面
Nokia E7
N記最新Symbian^3旗艦級手機，其800萬像素鏡頭採用全幅對焦技術，反應比自動對焦鏡頭更快更利落。解像度則達720p，拍片後可加入音樂、字幕及過場等剪片特效，並透過迷你版HDMI輸出至大電視欣賞，規格全面！
《第五屆亞洲電影大獎─「瞬間永記」短片比賽》
為宣傳《第五屆亞洲電影大獎》，香港國際電影節協會誠邀業餘短片製作發燒友參與「瞬間永記」短片比賽，拍攝道具不限，參賽者只要把難忘時刻拍成一分鐘短片即可參賽。參賽作品有機會被剪輯成宣傳短片於多個商場播放，獲選者更會被邀請出席《第五屆亞洲電影大獎頒獎禮》，一同見證盛事！
截止報名日期︰2011年3月14日
網上投票日期︰2011年3月18日
至 4月7日
網址︰http://video.asianfilmawards.asia
查詢︰（a）2343 2628 （b）2770 3710 （c）2136 6338 （d）2374 0618
