《真‧三國無雙6》新「晉」勢力拉隊踩場

唔經唔覺，KT Games嘅《真‧三國》系列原來已經十歲喇，咁多年來集集都係玩魏、蜀、吳三國嘅人物列傳，就算出新作都係整多幾個新人物，換吓造型，基本系統依舊不變，冇晒新意。不過喺最新推出嘅第六集中，除咗對應3D電視輸出外，亦追加全新勢力─晉，有大量新面孔參戰，以全新遊戲系統「編年模式」演活三國後期嘅各場精彩戰役！今次《真‧三國無雙6》一改以往人物換吓衫、轉吓戰鬥場景等例行公事，新作保留咗原有三國武將陣容外，更新增咗開創晉朝，結束亂世嘅「司馬一族」故事，大量三國後期人物穿梭於戰場之間，實現最完整嘅三國歷史。

無縫推進‧一氣呵成

一直以來，魏蜀吳三國各自維持自己勢力，互有勝算，弊在冇一個能夠結束三分天下嘅動亂局面。其中才智媲美諸葛亮嘅魏國軍師司馬懿，恃住有兩位智勇雙全嘅兒子，率領手下悍將「鄧艾」、智將「鍾會」等後起之秀企圖獨立，先排除魏國內部勢力，再挑戰剩低嘅蜀、吳兩國，開創晉朝建國之路。新作嘅故事流程唔再係睇完CG片交代劇情再Load戰鬥畫面，而改用時下流行嘅無縫式推進，唔使Load機一氣呵成，玩得特別順暢。

編年模式‧統一中原

新一集所收錄嘅「編年模式」，畀大家選擇自己鍾意嘅角色，响中原大陸嘅三國亂世中大展身手，目標係要統一中原。具體嚟講，中原大陸主要分成戰鬥關卡同埋都城關卡兩種類型，其中戰鬥關卡顧名思義就係劈友過版，而且完成戰鬥後會解放新縣城同埋追加新角色；至於都城關卡就設有各式設施，例如有武器店整裝備、設定「支援獸」幫手出戰等，仲可以參加「修學士」三國史問答比賽，贏咗更會獲得唔同獎勵，熟悉三國歷史嘅朋友千祈唔好錯過。

切換武器‧Combo駁招

戰鬥系統方面，參考過「芒亨」風格嘅《Mutli Raid》系列後，《無雙6》中武將除咗可以手執自家得意武器外，仲能夠任意裝備第二款武器，出招時切換武器就可以繼續追加Combo駁招，增加戰鬥嘅戰略性及機動性。當武將換番自己嘅得意武器，就可以使出獨特嘅「EX攻擊」迎擊敵人或者提升自己能力。另外，完成戰場任務或者擊倒大將都會得到「印」及「道具」怍獎賞，「印」可以強化武器；「道具」能夠提升武將數值，加埋能夠以戰鬥中賺取嘅「武勳」嚟修煉角色特技，打造出最強嘅三國武將！

遊戲檔案

名稱：《真‧三國無雙6》

類型：動作

平台：PS3

人數：1-2人

開發：KT Games

日期：3月10日

售價：約$600

稻船敬二（著名遊戲製作人）

* 1987年加入Capcom，在藤原得郎帶領下創作出《洛克人》。

* 1997年創作了PS大作《生化危機2》。

* 2001年製作出PS2首個百萬銷量大作《鬼武者》。

* 2005年由Capcom第二開發部部長升任至開發部常務委員。

* 2010年發表「日本遊戲已死」言論，同年正式辭任全球產品開發部部長，正式離開Capcom。

查詢：2359 7998