墜手暴龍D-Arts奧米加獸
無論80後或者90後嘅你，一定唔會唔識《數碼暴龍》，由最初可以套埋鎖匙嘅暴龍對戰機，到依家定期出OVA版，搞埋玩具、遊戲、卡Game，可謂無處不在。Bandai嘅D-Arts系列就繼去年戰鬥暴龍獸後，最近出埋結合咗戰鬥暴龍獸同鋼鐵加魯魯嘅最強Digimon，奧米加獸神聖降臨！
硬淨金屬Feel
既然係D-Arts版本，當然唔似Reboot模型版咁重膠感啦，雖然呢隻奧米加獸只係喺腳部加咗少少金屬件，但係身體其他部分都係用咗較硬淨嘅POM塑料，所以拎上手都幾夠重量，加埋機身白色部分用咗珍珠色，左右手又有金屬色打底，相當有質感。可玩性方面，右手有鋼鐵加魯魯變炮口，左手就有戰鬥暴龍獸銜實把劍，身體節狀骨架又可以稍作Z形扭動，腳趾仲可以獨立活動，就連披風都有兩款選擇，不過披風手感都幾化學，小心易碎！
查詢：2433 1828（瑞華行）
D-Art奧米加獸建議零售價：$539
上色夠質感，換埋一件過披風，擺出劍甫士真係型到冇朋友。
要換另一件下顎配件，仲要小心有少少彈性嘅牙齒，先變到發炮形態。