涼宮春日玩裝甲　萌爆開戰

從未諗過萌系角色加上精密機械感，兩者嘅化學作用原來好OK！事緣高達機設大師角木肇客串幫人氣輕小說《涼宮春日的憂鬱》主角整咗套「春日隊長機」，由於造型正斗，商品化呼聲不絕，加埋版權人角川書店嘅支持下，終於喺「Composite Ka」系列中萌爆登場。除咗體現Ka版一貫嘅精密設計及大大塊水印標誌外，仲Show埋Bandai人形素體關節嘅穩陣及耐玩性，真係估佢唔到咁好玩！

非高達系角色於Composite Ka登場，其實早已有之，仲記唔記得Keroro軍曹呀？咪着到成身裝甲商品化囉，不過軍曹玩具始終係「小朋友向」，所以喺冇乜人氣維持嘅情況下，出咗兩款就淡出，不過涼宮喺港日都有咁大班萌系Fans撐腰，長出長有都唔奇。

一件頭裝甲好易着

如果你玩開萌系×機械嘅女生Figure，好自然會將春日隊長機同Konami推出嘅《武裝神姬》相提並論，不過筆者覺得春日隊長機比較易玩，因為《武裝神姬》嘅變形換件比較複雜；相反春日隊長機嘅裝甲就係一件頭設計，只要揭開小腿護甲，就可以將涼宮直接套入去，易着又易除。另外，裝甲頭部嘅聲納接收器，設計成兔耳仔咁款，配合左右兩隻蝴蝶結，超級卡哇依！另一抵讚係腳掌Ball Joint出奇地咁實淨，唔使支撐架，點擺甫士都企得穩，要畀個「Like」佢！

Chok樣Parts任你換

拆開裝甲，齋玩涼宮本體Figure一樣咁好玩。今次用咗最受歡迎嘅兔女郎Look示人，Sexy黑色Tube Top配灰黑色襪褲，加多對「斗零踭」，勁有女人味。隨盒仲有兩款頭套及兩款面孔，加埋勁多唔同姿勢，例如V字手、手指指嘅手掌配件，等大家幫涼宮Set Chok樣，就算唔鍾意萌樣Figure嘅筆者，都對呢款春日隊長機為之心動！

查詢：2433 1828（瑞華行）