《Dead Space 2》 太空無重鞭屍執到寶
外太空打異形呢個老掉牙嘅橋段，好多遊戲都用過，不過好似兩年多前《Dead Space》咁可以殺出一條血路嘅作品真係唔多，新一集《Dead Space 2》除咗繼續大賣上集超煞食嘅無重狀態同斬手斬腳鞭屍外，細位都作出唔少改進，好似將成條能源棒鑲咗响主角條脊骨上，一望就知道仲捱到幾耐，還新增Multi Player模式，今個新年都殺氣騰騰！
故事延續自第一集，上回被臨危受命前往太空站救援嘅工程師Issac，今集繼續擔大旗，除咗要頂住外星怪物Necromorphs嘅追殺外，仲要對抗外星病毒感染及帶回外太空樣本，責任重大，總之遊戲嘅目的就係要保住條命仔，唔可以死。
鋸斷手腳 再補兩槍
《Dead Space》遊戲場景主要都係來自工作人員早已被殺清光嘅太空站，跟外星怪物大玩困獸鬥，呢啲外星生物更好有喪屍Feel，神出鬼沒，一不留神打開電梯門就會有怪獸撲入嚟咬人。若果聽見前面傳出怪聲，最好上定彈瞄準，就算打中後都要再補多幾槍，因為即使以Plasma Cutter(界)斷怪物手腳，佢仍然會爬住嚟攻擊，好鬼恐怖。打完後踩多兩腳鞭屍仲有機會跌出道具寶物，好玩抑或殘忍就真係見仁見智。
無重狀態 任飛任轉
最令人印象深刻嘅，除咗有可以(界)斷手腳嘅Plasma Cutter武器外，一定係無重狀態嘅工作室，可以喺密封空間內360度任意旋轉飛來飛去完成任務，呢個設計可以算係射擊遊戲嘅突破。今集《Dead Space 2》一樣設有多個無重力關卡，可以從中「飛」到不同高度的房間外，更要避過障礙物找尋出口，唔係開槍狂掃咁單向。要顧住打怪物，又要搵出口解謎咁忙，未必有時間睇吓剩低幾多能源，好在今集就特別將條能源棒鑲喺主角Issac嘅背脊上，一望就知仲有幾多血，而且隨住升級，能源棒會愈變愈長，由條頸直落到尾龍骨添！
多人對戰人魔互毆
今集仲有個特別設計，就係主角會失驚無神產生幻覺，間唔中會出現一啲幻想情節，但邊啲真邊啲假，要玩到最尾先知道。遊戲仍舊保留盔甲同武器升級系統，可以喺戰場上執金幣然後到自助售賣機升級，而且仲可以隨時走到儲存機上儲存進度，唔一定要過版先有得Save。針對上集欠缺嘅多人對戰模式，今次終於加入好似《Left 4 Dead》嘅連線玩法，支援四對四嘅人魔對戰，等大家試吓做恐怖外星怪物咬人嘅感覺。另外，PS3版相對地會更抵玩，皆因會加送埋對應PS Move操控嘅前傳《Dead Space：Extraction》，買一得二，打得更開心。
遊戲檔案
類 型：射擊
平 台：Xbox 360、PS3
開 發：Visceral Games
推出日期：1月27日
售 價：$380（PS3）
$329（Xbox360）
查 詢：3166 6001
最好用嘅就係呢把Plasma Cutter，切割口更可以調節成垂直或橫向。
畀怪物捉住，就要狂按掣先可以甩身。
每件盔甲都有負重限制，要提升物件攜帶量就要升級先得。
今集同樣支援武器升級系統，可以執金幣升呢。
多人模式玩法都幾似《Left 4 Dead》。
支援四打四網上對戰，唔想做人都可以反串扮演外星怪物。
外星怪物好難纏，要減低佢嘅活動能力，一定要先打斷佢嘅手手腳腳。
怪物會失驚無神走出嚟，無時無刻都要打醒十二分精神。
遊戲氣氛營造得幾陰森恐怖，令人不寒而慄。
遊戲一大特色係設有無重力狀態，可以浮在半空中移動。