得閒圍脖

marcovaldo：

某日傍晚坐喺銅鑼灣某咖啡店開着Notebook工作，只見一群為數十多人嘅中年男子（大部分為西裝友），霸佔咖啡店一角所有梳化位在圍打《芒亨3》，時而高呼大叫，時而粗口亂飛。到底這刻的我應該羨慕、妒忌抑或鄙視呢？我只知道那時候我還要趕Deadline交稿，忙得不可開交；就算唔提「新」出嘅《芒亨3》，三個月前買落嘅《NBA 2K11》、《Winning Eleven 2011》仍舊未開封，於是「到底幾時先有時間，真正乜都唔使理打番半日機呢？」呢個問題又再次於腦海中浮現。

Gilbert：

作為科技版記者，有幾個業界大Show必定要去，小記早前就有幸採訪美國CES，看到那比香港會展還要大十數倍的展場，即使小記「身經百戰」也被嚇了一跳。今屆CES重點繼續是3D電視，由0.2吋薄框、裸眼3D再到75吋LCD，各具賣點，但小記最近看到一個報告，指平板電視去年全球只有個位數百分比的增長，這除因為立體軟件支援不足外，最主要是舊的平板電視還未到達要更換嘅年期；這不禁令小記在想，這些技術走在最前的新電視，究竟有多少能真正入屋呢？

波仔：

人老咗買咩嘢都謹慎啲，好似賣咗成個月嘅《高達無雙3》，我都係最近先入手，諗住農曆新年時可以同親朋戚友打發吓時間。本身我只係對《三國無雙》有啲興趣，《戰國》同《高達》系列只係麻麻哋，但同事話最快要3月先有，想喺農曆新年玩，根本冇可能。加上，佢仲話今次嘅設定係前所未有咁完整，參戰機體夠多之餘，仲要多咗單挑按掣模式同戰友嘅好感度元素，令成隻Game嘅耐玩度同趣味性大增，睇嚟今個新年假都會幾充實！