on.cc 東方互動主頁

HP Pavilion Elite HPE SSD 24秒極速開《Win 7》

雖然Notebook夠輕夠細、一體Laptop夠型仔，不過礙於機件所限，價錢始終比傳統Desktop貴一截。近年，Desktop市場逐步縮細，但HP竟然唱反調，喺新一季推出全新Desktop系列HP Pavilion Elite HPE SSD版。顧名思義就係主打強效機能，由雙核心Core i3到四核心Core i7處理器嘅型號都有，而且各型號同時備有SSD以及SATA雙硬碟，唔使半分鐘就可以極速Boot機，加上內置GeForce顯示卡、4GB DDR3，效能頂班，用嚟打機、睇片抑或剪片、執相都冇Delay，一於換新機迎接2011年！

今次HP Pavilion Elite HPE系列推出三個型號，分別為438hk、458hk及478hk，前者用上Core i3處理器；而後兩者同樣採用Core i7處理器，但硬碟容量、記憶體及顯示卡等硬件配搭則略有不同，適合唔同需要嘅用家。

SSD極速Boot機

SSD固態硬碟雖然都推出咗好一段日子，不過價錢貴同容量細一直令用家卻步，於是Pavilion Elite HPE系列就同時具備SSD以及SATA雙硬碟，解決晒上述兩個煩惱。SSD既慳電又冇噪音，最重要係讀取速度夠晒快同穩定，所以HPE整個系列都內置160GB SSD，實測Boot入Windows 7只需24秒，而熄機更只需8秒，完全唔會浪費任何時間，抵讚！不過160GB SSD容量咁細，單撈兩、三段高清片好容易就冇位，所以另備較大容量嘅500GB SATA畀你慢慢用，雖然速度冇SSD咁快，但係用嚟Save檔案就夠晒實用，速度、容量都兼備。

雙芒剪片話咁易

買得Desktop，梗係對電腦機能有番咁上下要求，尤其有唔少用家都會用嚟執相、剪片，部腦差少少都隨時窒機。HPE系列起碼都用上Core i3雙核心處理器，時脈仲有成3.2GHz，加埋4GB DDR3記憶體，運行呢類大食程式當然冇問題。最重要係內置GeForce GT320顯示卡，除咗支援高清顯示之外，仲可以駁雙芒輸出，用嚟剪片就可以邊剪邊睇效果，夠晒方便！如果你鍾意打機嘅話，呢張GT320顯示卡都滿足到你，小記揀咗常用嘅《Street Fighter IV Benchmark》做測試，畫面全程保持大約60 FPS，效果非常流暢，而且顯示卡亦支援DirectX 10，打機冇難度！

黑紅機箱夠型仔

雖然HPE系列採用傳統直立式嘅機箱，講Size就唔算細，不過機箱型仔設計就攞番唔少分數。表面採用黑色拋光面，仲加埋少少流線型，而機箱前有紅色圍邊點綴，配色非常醒目。此外，機箱前除咗有外露嘅讀卡器之外，打開左下方揭蓋後仲有USB、1394、耳筒等插口，實用又方便。另外，原廠20吋芒採用黑色框架加上銀色型仔企架，配色同個機箱都幾夾，而且企架可以作大幅度上下調校角度，方便大家喺唔同角度觀看。而屏幕背後亦備有一組HDMI，接駁其他器材就更加靈活啦！