得閒圍脖

Sanna：

早幾日去參觀中環Cartier的新旗艦店，店內展示了多件珍貴品牌產品，名貴珠寶首飾當然不在話下，不過最矚目的並非價值連城的名貴珠寶，而是一座大型的龜鐘！這座上鏈大鐘頂部設有小型「水池」，池上以真龜殼製成的小龜就是指針，顯示時間，並以磁力來推動，栩栩如生，非常搞鬼。現場傳媒即時對錶，發現個鐘時間準確無誤。這座鐘於20年代製成，據說是由一名上海商人借出作展覽，真係非常佩服商人的創意，當然還有Cartier的工藝啦！

Kiki：

姪女洛怡升小一後，功課多不特止，一星期兩次默書，加埋學鋼琴游水，所餘的時間並不多，有時難得在星期六偷閒與她一敍Relax吓，已令我樂透半天。剛過去的星期六，我和嫂嫂帶她到小朋友的天地—冒險樂園大玩特玩，當中一部熊貓拍打Game，有埋影相功能，可以Key個頭落去熊貓度，洛怡圓圓的臉貼落圓圓的熊貓頭上，好Kawaii！不過下次相聚相信要諗過另一項活動，皆因個個星期都去冒險樂園的話，荷包必然受害！

Moe：

近日天氣咁乾燥，嘴唇即成重災區，爆坼得好緊要，梗係要有支潤唇膏傍身啦。護膚品牌fresh的黃糖系列出名長效滋潤，最近新出的梅果紅黃糖潤色護唇膏，售價$210，雖然頗貴，但不特止潤而不膩，仲有陣陣的黑加侖子味（我覺得似可樂香味多啲），令人心情開朗。護唇膏睇落去係勁深的酒紅色，塗上嘴後卻是透亮的淡紅色，睇落去健康又有光澤。我仲襯埋Lancôme的酒紅色甲油，今季酒紅色大熱呀，我話嘅！