爬木村頭合金大和號啟航
風靡日本超過36年、堪稱殿堂級國民卡通嘅《宇宙戰艦大和號》，今年認真大陣仗，除咗大除夕有木村拓哉主演嘅真人版大電影喺全國上畫外，玩具界更快人一步，今個月尾推出全新嘅超合金魂版本，唔使砌、唔使髹，粉絲都可以擁有大和號嘅超精密構造及及浩瀚氣勢！
發光又發聲
標榜「龐大」、「精密」、「氣勢」三合一嘅超合金魂大和號，全長超過400mm，比起卡通嘅造型更加流線，而且紅色艦底同灰色艦身嘅比例處理得啱啱好，夠分量但唔笨重。至於隨盒附上嘅展示台，透過換件可以擺出爬升及航行兩個形態，仲有一個紅外線Remote，用嚟控制戰艦聲效、艦首炮口及艦尾引擎LED嘅效果Effect，仲識播主題曲！至於艦身前段嘅兩組主炮及一組副炮，都可以自由轉動，艦橋後方嘅飛彈發射匣又可以開合；艙蓋及飛機升降台亦可以打開，跟埋八部戰機，畀玩家組織機隊。初回特典送埋敵人嘅飛鑽彈，重現艦頭被插嘅經典場面，你仲記唔記得先？
救地球向宇宙出發
做過檢察官、髮型師、賽車手、冰曲運動員及總理後，今次木村變身大和號船員，為咗救地球而展開宇宙長征。電影版講述西元2199年，謎之惑星「柯米拉星」不斷以幅射污染地球，好彩飛行員古代進（木村拓哉飾）執到一個由伊斯坎達爾星球發送嘅通訊膠囊，搵到消除輻射污染嘅裝置。地球防衞軍用膠囊中嘅設計圖，製成宇宙戰艦大和號，古代進與及一班船員利用僅餘時間向宇宙出發！
超合金魂宇宙戰艦大和號建議零售價：$1,850
引擎唔只識發光，仲可以用Remote播出起動聲效，夠晒震撼！
飛彈發射匣能上下移動，重現飛彈發射及收納狀態。
兩組主炮及一組副炮都轉到，三支炮管又可以上下擺動。
艦側左右可以加裝安定翼，展現高速航行形態。
艦橋頂部裝咗LED，透過Remote可以發光及發出警報聲效。
隨盒有八部戰機，包括Cosmo Zero、Cosmo Tiger、探索艇及逃生艇。
「初回特典」送Drill Missile，重現破壞波動炮嘅情景。
艦首嘅波動炮用咗LED，有變色功效外，仲可以用Remote控制發炮聲效。
合金版大和號全長425mm，入貨前先要諗諗屋企有冇位。