《Your Shape Fitness Evolved》 全身掃描 耍太極

記得《Wii Fit》初出時確實幾震撼，但始終需要使用平衡板，玩得唔夠Free。今個禮拜Kinect for Xbox 360正式推出，玩體感運動遊戲時，真正完全無拘無束。呢款由Ubisoft開發的《Your Shape Fitness Evolved》，除咗可以玩到由專業健身教練設計嘅健身課程，以及好玩又消脂嘅迷你遊戲外，更加係同類遊戲中首次加入太極鍛煉，想Keep Fit嘅OL到耍開太極嘅長者都啱玩！

跟其他同類遊戲唔同，當新玩家企喺Kinect鏡頭前準備玩遊戲時，《Your Shape》會自動幫大家做個全身掃描，感應各關節位置及身體比例，而肢體動作更可以在遊戲內的主角上完全反映，非常準確。

糾正錯誤姿勢

《Your Shape Fitness Evolved》係今年6月E3遊戲展中，其中一款台上有份參與示範的Kinect遊戲，除咗當遊戲玩之餘，最緊要係可以提醒你姿勢是否正確，幫你糾正每個動作，要知道做Gym時，做錯動作，隨時扭傷肌肉！遊戲今次更用上特別的投射影像顯示玩家的姿勢，只要大家Keep住玩同達到某程度表現，原本的顯示投射影像，就會變成油畫或水彩效果，愈玩就愈靚！

設針對性鍛煉

遊戲仲請咗兩位星級健身教練Michael George同Michelle Bridges客串陪你玩，既會為大家設計出針對性的健身課程，仲會糾正大家的姿勢，同真正去Gym差唔多，好似跟NIVEA合作的課程可以幫女士們收下半身線條；男士們亦可參與修練背肌同「老鼠仔」的各種課程。《Your Shape》專業健身鍛煉更照顧埋長者，例如首次加入太極操，長者除咗朝早落公園耍之外，晏晝歎完茶都可以喺屋企練習吓，真係男女老幼都一樣啱玩。

有趣消脂Mini Games

《Wii Fit》的成功某程度上來自好玩的Mini Games，《Your Shape》都收錄咗4款得意消脂迷你遊戲，筆者比較鍾意玩用手接住從天而降箱子的Stack'em Up遊戲，看似運動量唔太大，但要一直Keep住雙手做接箱姿勢，對收緊手臂都幾有用，玩得幾鋪雙手都有啲痠痛。至於模特兒Paris就鍾意玩呼拉圈Loop-A-Hoop，可以收腰之餘，畫面上嘅波波仲會隨住小蠻腰嘅扭動而飛起，感覺好有趣。另外兩款分別係擊碎畫面上不同磚塊嘅Virtual Smash，以及按畫面指示跟住踩嘅Light Race。玩完仲會打出所消耗嘅卡路里，唔經唔覺就可達到Keep Fit效果！

遊　戲　檔　案

類　　型：運動

開　　發：Ubisoft

平　　台：Kinect for Xbox 360

推出日期：11月18日

售　　價：$299

查　　詢：2418 8896