瀛貓 落戶MK

熟我嘅朋友都叫我做「叻貓」，除咗因為我養貓之外，但凡係貓咪圖案嘅產品我都好鍾意，所以朋友仔經常會送貓精品畀我﹗啱啱又收到新禮物，晒畀大家睇！

呢份禮物係由日本知名繪本作家池田晶子所創作嘅達洋貓（Wachifield Dayan）卡片套，去過東京嘅人都一定認得呢隻貓，因為佢响當地好受歡迎，但由於達洋貓之前响香港未有正式代理，所以本港粉絲淨係買到水貨，又或者近近哋飛去台灣掃貨。不過我啱啱收到風，Wachifield Dayan已落戶於旺角朗豪坊、開設正式授權專門店，店內有過百款可愛精品，包括家品、擺設、文具、服飾等，大家以後唔使再四圍撲啦！

設計師大起底

池田晶子細時係一個體弱多病嘅小女孩，每日瞓响床上望窗，又或去圖書館睇《格林童話》，幻想會創造出自己嘅童話世界。長大後，她跟隨媽媽走上創作之路，以皮革做畫布，創作出貓咪Dayan，慢慢建造個人嘅童話國度Wachifield。又係一個真人勵志故事！

查詢：2628 6066

周末簽帳送美食

為吸引大家消費，各大商場與銀行嘅宣傳花款可謂多籮籮，我最新八到好正嘅信用卡推廣優惠，由即日至11月30日（逢周六、日及公眾假期），憑中銀銀聯雙幣信用卡到海港城、時代廣場消費滿$800，憑最多兩項消費之簽帳存根及商戶發票，換領$100美食禮券，禮券數量有限，送完即止。我呢排逢星期六、日都密密換禮券，想用平價品嘗美食？Easy啦！

查詢：2108 3288

半價傢俬爭住掃

唔好睇我成日鍾意買模型、着潮服，其實我都好識精打細算，吼實減價先會重錘出擊！好似由即日至11月30日，實惠全線傢俬低至半價發售，包括床架、書櫃、梳化、電腦枱等，我就梗係唔執輸，送咗個儲物櫃畀老婆、買咗張書枱畀囝囝，自己就要咗張梳化床，咁我以後半夜睇波都可以舒舒服服做「廳長」吖嘛！

查詢：2663 8833

歐陸廚具大平賣

掃平貨一直都係我呢啲精明師奶仔嘅畢生任務，除咗可以借啲意「打斧頭」之外，最重要係有執平貨嘅成功感！早兩日聽到隔籬屋陳師奶買咗英國Ulster Weavers嘅廚房用品，睇個外形真係好鬼靚，不過當時嫌貴冇買到。點知今日行開永安百貨，發現由即日至11月30日正進行「歐洲生活品味」活動，好多廚具用品都會以特價發售，好似Ulster Weavers就正進行八折優惠，除咗煲同鑊之外，焗爐、咖啡機都齊備，正！

查詢：2318 2395