舉世知名嘅法拉利，創辦人係Enzo Ferrari，佢係狂熱嘅賽車迷，當初成立法拉利，都只係為咗參賽，冇諗過生產量產型號賺錢。不過賽車係燒銀紙嘅遊戲，去到1947年終於破例，炮製出廠方首款量產車125S。呢款車一推出，就為法拉利打響名堂，既然出量產車同賽車可以兼得，車廠冇理由走回頭路，從此法拉利實行雙線發展，成為汽車市場及賽車場嘅頂級名牌。