Ferrari SA Aperta欽點買家 城城有冇份 ？

相信冇乜邊幾個男人唔將法拉利（Ferrari）當做Dream Car！不過最平嗰款都賣超過三百萬港紙，又有幾多人買得起？所以，郭富城千祈唔好怪全城大部分男人都妒忌你，因為你出晒名係車狂，仲幾乎款款法拉利都有齊，你話你幾「可惡」！啱啱喺巴黎車展首度現身嘅599 SA Aperta，唔知你又訂咗未呢？

除咗郭天王，相信凡係法拉利嘅車迷，都一定識得賓利法連拿（Pininfarina），呢間意大利嘅著名設計工作室，同法拉利合作超過半世紀，無論係經典型號250及Dino，以至近期嘅Enzo Ferrari、599及612等，統統出自賓利法連拿手筆。今年法拉利推出599 SA Aperta，除咗為599車系畫上完美句號，更作為賓利法連拿成立80周年嘅賀禮；SA正係賓利法連拿嘅創辦人—Sergio Pininfarina及Andrea Pininfarina父子嘅名字縮寫，至於Aperta，即係意大利文「開啟」嘅意思，講到明係一款開篷超跑。

追求流線美　599終極型號

SA Aperta被視為599系列嘅最後型號，除咗突然落雨，否則廠方預期車主大部分時間都會開篷駕駛，為咗盡量展現開篷車嘅美態，以及減少對車重及車身結構嘅影響，所以採用軟篷設計。因此，相比於其他599型號，SA Aperta擁有更斜嘅A柱及大銀幕，原來嘅C柱就變成防滾桿，帶嚟更低阻力嘅氣動力效果，就連座椅高度都降低埋，開車更有Racing Feel。

限量80輛　全數沽清

性能方面，有別於廠方傳統嘅中置引擎布局，SA Aperta採用前置引擎、後輪驅動（FR），引擎方面用咗599 GTO嘅6.0公升V12引擎，馬力高達670hp/8,250，就連扭力都勁到63.2kgm/6,500rpm，並且考慮到開篷車嘅氣動力需要，對底盤進行強化調校，追求高速之餘，相信操控能力都會有驚喜表現。

講到SA Aperta咁吸引，幾時有得買？賣幾錢先？Sorry，雖然廠方仲未定價（據聞稅前售價高達40萬歐元），但呢款全球限量80部嘅新法拉利，已經全數名車有主，正如車廠大老闆Luca di Montezmolo所講：「呢部車唔會公開發售，買家資格會由我哋決定，我哋已經鎖定晒車主名單喇！」咁講法，郭天王會唔會已經榜上有名呢？

郭天王嘅法拉利珍藏，足以組成車隊，咁多型號，相信佢最愛嘅係Enzo Ferrari。呢部車以法拉利嘅創辦人命名，全球限量399部，最初抵港已經標價550萬港紙，依家嘅身價肯定更高。由於呢款車只有左(車太)版，所以都幾難見到郭天王揸出街。